समाचार सुन्नुहोस :
काठमाडौँ – एमाले सांसद गोकुल बास्कोटाले आफ्नो क्षेत्रमा बाटो नबनेकोप्रति सरकारको ध्यानाकर्षण गराएका छन्। बुधबार प्रतिनिधिसभा बैठकको शून्य समयमा बोल्दै सांसद बास्कोटाले पाँचखाल र नगरकोट सडक नबनेको प्रति सरकारको ध्यानाकर्षण गराएका हुन्। काभ्रे जिल्लाका किसानले दूध बेचेको पैसा नपाएको भन्दै कहिले रकम पाउँछन् भनेर समेत सरकारसँग प्रश्न गरेका छन्।
बास्कोटाले पुष्पकमल दाहाल प्रचण्ड नेतृत्वको सरकारजस्तो नालायक अरु कुनै नभएको टिप्पणी गरेका छन् । प्रतिनिधिसभाको शून्य समयमा बोल्दै यो भन्दा जवाफदेहीविहीन सरकार इतिहासमा कहिल्यै नभएको जिकिर गरे ।
‘प्रधानमन्त्रीज्यू भन्नुहुन्छ रामराज्य आइसक्यो, यहि हो रामराज्य?’, उनले आक्रोशित हुँदै भने, ‘यो भन्दा नालायक, गतिहीन र जवाफदेहीताविहीन सरकार इतिहासमा कहिल्यै थिएन, जसको न कान छ न आँखा छ। कहिले सुन्छ सरकारले?’
