टोकियो – जापानको अन्तरिक्ष एजेन्सीले चन्द्रमाको सतहमा आफ्नो अन्तरिक्ष यानको ‘न्यूनतम सफलता’ र ‘सफ्ट ल्यान्डिङ’ पुष्टि गरेको छ । जापानको अन्तरिक्ष एजेन्सी जाक्साले यो मिसनलाई ‘प्रमुख कोसेढुङ्गा’ र भावी अन्तरिक्ष अन्वेषण अभियानका लागि ठुलो कदम भनेको छ ।
जाक्साका अध्यक्ष हिरोशी यामाकावाले अवतरण सफल भएको बताउँदै अन्तरिक्ष यानसँग सञ्चार सम्भव भएको बताए । उनले चन्द्रमाको सतहमा अवतरण र सञ्चारलाई मिसनको ‘न्यूनतम सफलता’ भनेका छन् । उनले थप निष्कर्ष निकाल्न तथ्याङ्कको मूल्याङ्कन गर्ने बताए । ‘हामीलाई चन्द्रमाको सतहमा पुग्न सक्षम हुन विभिन्न देशहरूसँग अन्तर्राष्ट्रिय सहयोग चाहिन्छ, जुन पहिले नै चलिरहेको छ,’ उनले भने ।
सटीक अवतरण सफल भएको तर एजेन्सीलाई विश्लेषण गर्न करिब एक महिना लाग्ने उनको भनाइ छ । हिरोशी यामाकावाले पनि जापानले चन्द्रमामा यस्ता थप सवारी साधन पठाउने बताए । उनले भने, ‘हामी पनि मंगल ग्रह जाने योजनामा छौँ ।’
त्यसपछि जाक्साका तीन अधिकारीले पत्रकार सम्मेलन गरी पत्रकारका प्रश्नको जवाफ दिएका थिए । जाक्साका अधिकारी हितोशी कुनिनाकाले अन्तरिक्षयानका केही प्रणालीहरू शक्ति बचत गर्न बन्द गरिएको छ, किनभने यो अहिले पूर्ण रूपमा ब्याट्रीहरूमा निर्भर छ ।
ब्याट्री धेरै घण्टा टिक्ने अपेक्षा गरिएको र सोलार जेनेरेटर सुरु गर्न जाक्सा टोलीले हरसम्भव प्रयास गरिरहेको उनले बताए । उनले निर्धारित लक्ष्यभन्दा १०० मिटर भित्र अन्तरिक्ष यान अवतरण गरेको यकिन मात्रै यो मिसन पूर्णतया सफल घोषित हुने बताए । तर, पुष्टि हुन एक महिना लाग्न सक्छ । अमेरिका, पूर्व सोभियत संघ, चीन र भारतपछि चन्द्रमाको सतहमा पुग्ने पाँचौँ देश जापान हो । गत वर्ष मात्रै भारतले चन्द्रयान सफलतापूर्वक चन्द्रमाको सतहमा पठाएको थियो ।
