बिहिबार, फाल्गुण १०, २०८०
Thursday, February 22, 2024

समाचार सुन्नुहोस : 

काठमाडौँ – भूकम्प गएको पाँच दिनपछि जापानमा भूकम्प प्रहरी र उद्धारकर्मीले एक ९० वर्षीया वृद्धालाई भत्किएको घरबाट सकुशल बाहिर निकालेका छन् । इशिकावा प्रान्तको सुजु सहरमा सोमबार गएको भूकम्पपछि दुई तले घरको भग्नावशेषमुनि ती महिला पुरिएकी थिइन् । योमिउरी अखबारले महानगरीय प्रहरी विभागलाई उद्धृत गर्दै भन्यो कि ती महिला हाइपोथर्मियाबाट पीडित देखिन्थ्यो तर भग्नावशेषबाट निकाल्दा उनी सचेत थिए। हाइपोथर्मियामा शरीरको तापक्रम सामान्यभन्दा कम हुन्छ । तापक्रम, पानी वा खानाको पहुँच जस्ता कारकहरूका आधारमा लामो समयसम्म बाँच्नको लागि सम्भव भए पनि भूकम्पको भग्नावशेषमुनि गाडिएका व्यक्तिहरू सामान्यतया तीन दिनसम्म बाँच्ने विज्ञहरू बताउँछन्।

भूकम्पमा परी १२६ भन्दा बढीको मृत्यु भइसकेको छ भने ५ सयभन्दा बढी घाइते भएका छन् जसमध्ये २७ जनाको अवस्था गम्भीर छ । करिब ३० हजार मानिसलाई विस्थापित गरी विद्यालय र अन्य सुविधामा राखिएको छ तर उनीहरुलाई सहयोग उपलब्ध गराउन कठिनाइ भइरहेको छ । चिसो र भोकले मानिसहरु हैरान छन् । जापानको पश्चिमी तटीय क्षेत्रमा सोमबार ७.६ म्याग्निच्युडको भूकम्पपछि ठूलो संख्यामा मानिसको घर र डुंगामा क्षति पुगेको छ। यसबाहेक दुई सयभन्दा बढी अझै बेपत्ता छन् ।

जापानका भूकम्पपीडितलाई सहयोग गर्न धेरै देश अगाडि आएका छन् । यसैबीच उत्तर कोरियाली नेता किम जोङ उनले जापानका प्रधानमन्त्री फुमियो किशिदालाई सन्देश पठाएर भूकम्प पीडितप्रति सहानुभूति प्रकट गरेका छन् । जनतालाई सहयोग गर्न हजारौं सैनिक हवाई र जलमार्गबाट सहयोगमा जुटेका छन् ।

तपाईको प्रतिक्रिया