काठमाडौं – भारतले जारी आइसीसी क्रिकेट विश्वकपमा लगातार तेस्रो जित हासिल गरेको छ । शनिबार सम्पन्न खेलमा पाकिस्तानलाई ७ विकेटले पराजित गर्दै भारतले यस विश्वकपमा लगातार तेस्रो जित हासिल गरेको हो ।
पाकिस्तानले दिएको १९२ रनको लक्ष्य पछ्याएको भारतले ३०.३ ओभरमा ३ विकेट गुमाउँदै लक्ष्य पुरा गरेको थियो । भारतका लागि कप्तान रोहित शर्माले सर्वाधिक ८६ रन बनाएका थिए भने श्रेयस अय्यरले अविजित ५३ रन बनाएका थिए । शुभमन गिल र विराट कोहलीले १६-१६ रन बनाए भने केएल राहुलले अविजित १९ रन बनाए । पाकिस्तानका बलर शाहिन शाह अफ्रिदीले २ विकेट लिए भने हसन अलिले एक विकेट लिएका थिए ।
यसअघि टस हारेर पहिला ब्याटिङ गरेको पाकिस्तान ४२.५ ओभरमा अल आउट हुँदै १९१ रन बनाएको थियो । पाकिस्तानका लागि कप्तान बाबर आज़मले सर्वाधिक ५० रन बनाए भने मोहम्मद रिज़वान ४९ रनमा आउट भएका थिए । एक समय केवल ३ विकेट गुमाएर १५५ रन बनाएको पाकिस्तानको टिम त्यसपछि सम्हालिन नसक्दा १९१ रनमै अल आउट भएको थियो । भारतीय बलर जसप्रित बूमराह, मोहम्मद सिराज, हार्दिक पाण्डेय, रवीन्द्र जडेजा र कुलदीप यादवले २-२ विकेट लिएका थिए ।
यो जितपछि भारतको ३ खेलमा ६ अंक भएको छ र अंक तालिकामा शीर्ष स्थानमा उक्लिएको छ । त्यसैगरी पाकिस्तानको भने ३ खेलमा ४ अंक रहेको छ । अब भारतले आफ्नो चौथो खेल आगामी बिहीबार बंगलादेशविरुद्ध खेल्ने छ भने पाकिस्तानले अर्को खेल शुक्रबार अस्ट्रेलियाविरुद्ध खेल्ने छ ।
