टोकियो – टोकियोस्थित नेपाली राजदूतावासले घुम्ती सेवा दिने भएको छ । राजदूतावासले, गैरआवासीय नेपाली संघ, राष्ट्रिय समन्वय परिषद् (एनआरएनए) जापानसँगको सहकार्यमा राहदानी तथा कन्सुलर सेवा दिने उद्देश्यले घुम्ती सेवा सञ्चालन गरिने भएको हो ।
जापानका ८ शहरमा बसोबास गर्ने नेपालीहरूले आफू बसेकै ठाउँमा राहदानी र कन्सुलरसहित दूतावासले प्रदान गर्ने सेवाको लाभ लिनसक्नेछन् । दूतावासले सोमबार जारी गरेको सूचनाअनुसार होक्काइदोमा नोभेम्बर ४ र ५ तारिख, नागोयामा डिसेम्बर २, ३ र ४ तारिख, फुकुओकामा जनवरी १३, १४ र १५ तारिख, ओशाकामा फेब्रुअरी १०, ११ र १२ तारिख, गुम्वाकेनमा मार्च २०२४, ओकिनावामा अप्रिल २०२४, फुकुसिमामा मे २०२४ र तोचिगी जुन २०२४ घुम्ती सेवा सञ्चालन हुने भएको छ ।
घुम्ती सेवामा राहदानीको अवधि एक वर्ष भन्दा कम भएको, जापानमा जन्मेका बच्चाको र हराएको राहदानी बनाउने प्रक्रिया गर्न सकिनेछ भने अधिकृत वारेशनामा प्रमाणीकरण, यात्राअनुमतिपत्र, कागजात प्रमाणीकरण लगायतका सेवाहरु उपलब्ध हुनेछन् । ‘काबु बाहिरको परिस्थिति आइपरेमा माथि उल्लेखित मितिमा हेरफेर हुनसक्नेछ र हेरफेर भएमा सो को जानकारी यथाशीघ्र गराइनेछ,’ दूतावासद्वारा जारी सूचनामा भनिएको छ ।
