काठमाडौं – राष्ट्रपति रामचन्द्र पौडेलको आह्वान गरेको सर्वदलीय बैठक सकिएको छ । संसद् बैठक अगाडि बोलाइएको बैठक सकिएको हो ।
बैठकका क्रममा राष्ट्रपति पौडेलसमक्ष संसद्को अवरोध खोल्नेदेखि देशको आर्थिक स्थितिलगायतका समसामयिक विषयमा नेताहरूले आफ्नो धारणा राखेका थिए । सोही क्रममा प्रधानमन्त्री पुष्पकमल दाहाल ‘प्रचण्ड’ले संसद् सुचारु होस् र यसमा राजनीतिक दलबीचमा समझदारी बनोस् भन्ने राष्ट्रपतिको सकारात्मक धारणा रहेको बताए । आफूहरू निरन्तर छलफलमा रहेको उनको भनाई छ ।
राष्ट्रपतिको शुभेच्छामा कसैले विमति राख्नुपर्ने कारण नभएको उनले बताए । ‘संविधानको रक्षा र कार्यान्वयन तथा जनताले चाहेजस्तो गरी संसद् सुचारु होस् र यसमा राजनीतिक दलहरूको बिचमा समझदारी बनोस् भन्ने राष्ट्रपतिज्यूको शुभेच्छा अत्यन्तै सकारात्मक छ,’ प्रधानमन्त्री प्रचण्डले भने, ‘यसमा कसैले विमति राख्नुपर्ने कारण छैन । हामी निरन्तर छलफलमा छौँ । संसद् सुचारु गर्ने सहमतिको करिब करिब नजिक पुगेका छौँ । राष्ट्रपतिको शुभेच्छाप्रति आभार व्यक्त गर्दछु ।’
विमानस्थलबाट भित्रिएको तस्करीको सुनबारे छानबिन गर्न उच्चस्तरीय समितिको माग गर्दै नेकपा एमालेले साउन १० देखि निरन्तर संसद् अवरोध गरेपछि राष्ट्रपतिले त्यसप्रति चासो देखाएका हुन् । तर बैठकमा प्रमुख प्रतिपक्षी दल नेकपा एमाले भने सहभागी भएन ।
