काठमाडौँ – पश्चिमी अफ्रिकी देश नाइजरमा सैनिकले सत्ता हातमा लिएको छ । नाइजरका सेना प्रमुखले देशको संविधान भंग भएको घोषणा गर्दै सत्ता हातमा लिएको बीबीसीले जनाएको छ । राष्ट्रिय टेलिभिजनमा सम्बोधन गर्दै सैनिक प्रमुखले सबै सरकारी संस्थान र देशका सबै सिमाना बन्द गरिएको पनि बताएका छन् । कर्नेल अमादु अब्दराम अन्य नौ जना सैनिक अधिकृतहरूसँगै बसेर टेलिभिजनमार्फत् सम्बोधन गरेका थिए ।
सम्बोधनमा उनले देशको सुरक्षा व्यवस्था लगातार बिग्रिँदै गएको र आर्थिक तथा सामाजिक व्यवस्था पनि नाजुक भएपछि शासन सत्ता हातमा लिएको बताएका छन् । सबै स्थल र हवाई सीमा बन्द गरिएको छ। अर्को सूचना नआएसम्म रात्रि कर्फ्यू लाग्ने बताएका छन् । समाचारमा जनाइएअनुसार राष्ट्रपति मोहम्मद बजुमलाई सैनिक हिरासतमा राखिएको छ । नाइजरका राष्ट्रपति बाजुमलाई बुधवार बिहानैदेखि राष्ट्रपति गार्डको सेनाले नियन्त्रणमा लिएको छ ।
सबै बाह्य साझेदारहरूलाई हस्तक्षेप नगर्न उनले आग्रह गरेका छन् । राष्ट्रपति समर्थकहरूले भने राष्ट्रपति मोहम्मद बजुमलाई रिहा गर्न माग गर्दै विरोध प्रदर्शन गरेका छन् ।
