काठमाडौं – नेकपा एकीकृत समाजवादीले नेता घनश्याम भुसाललाई पार्टीको महासचिव बनाएको छ । पार्टी सचिवालयको ५३ औं बैठकले भुसाललाई महासचिव बनाएको हो ।
यसअघि महासचिव रहेको डा. बेदुराम भुसाललाई उपाध्यक्ष चयन गरिएको उपमहासचिव गंगालाल तुलाधरले जानकारी दिए । गत फागुन २९ गते घनश्याम भुसाल एकीकृत समाजवादी प्रवेश गरेका हुन् । प्रतिनिधि सभामा एमालेले उम्मेदवार नबनाएपछि पार्टी परित्याग गरेका भुसाल स्वतन्त्र उम्मेदवारका रुपमा रुपन्देही १ बाट चुनावमा होमिएका थिए ।
गठबन्धनको साथ भुसाललाई भए पनि उक्त क्षेत्रमा एमालेका छविलाल विश्वकर्मा निर्वाचित भएका थिए । एमालेका अध्यक्ष केपी शर्मा ओलीको कटू आलोचकका रुपमा स्थापित भएका भुसाल एकीकृत समाजवादी प्रवेश गरेको अढाइ महिनामै उनी महासचिव भएका हुन् वाम राजनीतिक वृत्तमा भुसाल अध्ययनशील नेताका रुपमा स्थापित छन् ।
