काठमाडौँ – दक्षिण कोरिया र जापानका शीर्ष नेताहरुको ऐतिहासिक शिखर वार्ता हुनुभन्दा केही घण्टा अगाडि उत्तर कोरियाले इन्टरकन्टिनेन्टल ब्यालिस्टिक मिसाइल (आईसीबीएम) प्रक्षेपण गरेको छ । दक्षिण कोरियाको सेनाले स्थानीय समय अनुसार बिहान ७:१० मा प्योङयाङबाट ब्यालेस्टिक मिसाइल प्रक्षेपण गरी कोरियाली प्रायद्वीपको पूर्वी समुद्री क्षेत्रमा उडेको जनाएको छ । यसै क्रममा जापानी रक्षा मन्त्रालयले उक्त मिसाइल जापानको टापुबाट २५० किलोमिटर टाढा खसेको जनाएको छ । यसअघि यो ६ हजार किलोमिटरभन्दा बढीको उचाइमा करिब ७० मिनेटमा १ हजार किलोमिटर उडेको थियो ।
दक्षिण कोरियाको सेनाले उक्त क्षेप्यास्त्र प्रहार संयुक्त राष्ट्रसंघको प्रस्तावविपरीत भएको बताएको छ । उत्तर कोरियाले यो उक्साहटको मूल्य चुकाउनुपर्ने चेतावनी पनि दिएको छ । दक्षिण कोरियाले जापान र अमेरिकासँग बलियो सुरक्षा सहयोगका लागि पनि आह्वान गरेको छ ।
मिडिया रिपोर्टका अनुसार जापान र दक्षिण कोरियाले मिसाइल परीक्षणपछि संयुक्त राष्ट्र सुरक्षा परिषद्को बैठक बोलाउन माग गर्न सक्नेछन् । दक्षिण कोरिया र अमेरिकाबीच जारी सैन्य अभ्यासका बीच उत्तर कोरियाले पटकपटक मिसाइल प्रहार गरेको छ । योसँगै प्योङयाङले यो सैन्य अभ्यासको निन्दा गरेको छ ।
