यू-१९ विश्वकपमा पुगेको नेपाली टिमका खेलाडीलाई जनही १ लाख दिने क्यानको घोषणा

काठमाडौँ – युएईविरुद्ध सनसनीपूर्ण प्रदर्शन गर्दै यू–१९ विश्वकप क्रिकेटमा पुर्याउने नेपाली टोलीका प्रत्येक खेलाडीले एक-एक लाख रुपैयाँ नगद पाउने भएका छन् । दीपेश कंडेलले सनसनीपूर्ण ह्याट्रिक गरेपछि नेपालले युएईलाई ७ रनले पराजित गर्दै नेपालले श्रीलंकामा हुने विश्वकपमा स्थान बनाएपछि क्रिकेट एसोसियसन अफ नेपाल (क्यान)ले यस्ताे घाेषणा गरेकाे हाे ।

हार्नै लागेको म्याचलाई जितसम्म पुर्याएर महत्वपूर्ण जित दिलाएपछि क्यानले टिमका प्रत्येक खेलाडीलाई नगद एकएक लाख रुपैयाँ दिने घोषणा गरेको हो । १९२ रनको लक्ष्य पछ्याएको युएई ४८ ओभरमा १८४ रनमा समेटिएपछि नेपालले महत्वपूर्ण जित निकालेको हो । कँडेलले ४७.३ ओभरपछिका लगातार तीन बलमा ३ विकेट लिएर ह्याट्रिक पूरा गर्दै महत्वपूर्ण जित दिलाए ।