टोकियो – जापानमा लगभग ८० हजार श्राइन र ७५ हजार मन्दिर छन् । जापानका मन्दिर र श्राइन आन्तरिक र अन्तर्राष्ट्रिय यात्रुहरूका बीचमा सबैभन्दा लोकप्रिय पर्यटक आकर्षणहरू मध्ये एक हो ।
दुबैको समान वास्तुकला र औपचारिक महत्व छ । तर के तपाईंलाई थाहा छ श्राइन र मन्दिरमा के फरक छ ? सरल भाषामा भन्नु पर्दा श्राइन शिन्टो धर्मावलम्बीको आस्थाको केन्द्र हो भने मन्दिर बौद्ध धर्मावलम्बीको । यसका साथै श्राइन र मन्दिरको बनावटमा पनि फरक हुने गर्दछ । त्यस्तै श्राइन र मन्दिर प्रवेश गर्दा गरिने शुद्धीकरण र पुजा गर्ने तरिकामा पनि फरक हुने गर्दछ ।
श्राइनलाई जापानीमा जिन्जा भनिन्छ । शिन्तोवादमा ब्रह्माण्डका हरेक चिज पहाड, जंगल, चट्टान, रूख, प्रकृति र अन्य सबै चीजहरूमा आत्मा हुने मानिन्छ र सबैलाई देवताको रूपमा पूजा गरिन्छ । अर्कोतर्फ मन्दिरलाई जापानीमा तेरा भनिन्छ । मन्दिरहरूमा बुद्धको मूर्ति राखिएको हुन्छ र बुद्ध धर्मको पूजा गरिन्छ ।
श्राइन र मन्दिर चिन्नको लागि अर्को बिन्दु भनेको प्रवेश गर्ने मूलद्वार हुन् । श्राइनका प्रवेशद्वार साधारण तर ठूलो र रातो रंगको हुन्छ जसलाई जापानीमा तोरी भनिन्छ । र मन्दिरको प्रवेशद्वार भने राम्रोसंग निर्मित जटिल संरचनाको हुन्छ । केही मन्दिरहरूको छेउछाउमा चिहान पनि हुने गर्दछ । यसबाहेक श्राइनहरुमा बाहिर कुकुरको आकारको मूर्ति (कोमाइनु)हरु देखिन्छ भने मन्दिरहरूमा बुद्धका मांसपेशी संरक्षकको मूर्तिहरु देखिन्छ ।
त्यसैगरी श्राइन प्रायः विवाह, सुखी जीवन वा सफल व्यवसायको प्रार्थनाको लागि दर्शन गरिन्छ भने मन्दिर अन्त्येष्टि वा पुर्खाहरू वा हराएको प्रियजनहरूसँग कुराकानी गर्न दर्शन गरिन्छ । सामान्यतया श्राइनमा प्रवेश गर्नु अघि, गेट नजिकैको कुण्डको पानी प्रयोग गरेर आफूलाई शुद्ध गरिन्छ भने मन्दिरमा प्रवेश गर्नु अघि, धूप बालेर आफूलाई शुद्ध गरिन्छ ।
