काठमाडौँ – क्यालिब्रेसन उडानका कारण त्रिभुवन अन्तर्राष्ट्रिय विमानस्थलबाट हुने उडान आज पनि प्रभावित हुने भएको छ । त्रिभुवन अन्तर्राष्ट्रिय विमानस्थलमा नयाँ जडान भएका उपकरणको परीक्षणका लागि बिहीवारदेखि भइरहेको क्यालिब्रेसन उडानका कारण आन्तरिक वायुसेवाको उडान प्रभावित हुनेछन् ।
विमानस्थलका प्रवक्ता टेकनाथ सिटौलाका अनुसार बिहीवार क्यालिब्रेसन नसकिएकाले शुक्रवार पनि गर्नुपर्ने भएको छ । क्यालिब्रेसन उडानका कारण बिहीवार आन्तरिक वायुसेवाका उडान प्रभावित भए भने आज पनि व्यवस्थापन मिलाउन समस्या पर्ने बुद्ध एयरका सञ्चार संयोजक दीपेन्द्र कर्णले बताए । उनले भने, ‘नोटाम जारी भएका कारण उडान प्रभावित हुँदा यात्रुलाई समस्या हुन्छ । वायुसेवा कम्पनीलाई पनि उडान व्यवस्थापन मिलाउन गाह्रो हुन्छ ।’ दिउँसोको समयमा प्रभावित भएको उडानको असर बेलुका अबेरसम्म पनि पर्ने कर्णले बताए ।
