काठमाडौं – आज देशभरि नयाँ सांसदका लागि मतदान भइरहेको छ । देशभरिका विभिन्न मतदान केन्द्रमा मतदाता लाइनमा बसिरहेका बेला त्रिभुवन अन्तर्राष्ट्रिय विमानस्थलमा पनि लाइन छ । तर, यो लाइन भोट हाल्नेहरूको नभई विदेश जानेहरूको हो ।
चुनावको दिन पनि सयौंको संख्यामा नेपालीहरू विदेश गइरहेका छन् । पछिल्ला वर्षहरूमा वैदेशिक रोजगारीका लागि ठूलो संख्यामा नेपालीहरू खाडी मुलुकसहित मलेसिया र दक्षिण कोरिया जाने गरेका छन् ।
आइतबार रातीको उडानबाट विदेश जान लागेका उनीहरुको देशका नेताहरुप्रति आश र भरोसा छैन । नयाँ युवा, स्वतन्त्र युवा र देशमै केही गरौँ भन्ने युवाहरु चुनावमा उठेपनि उनीहरुका सुनौला नाराले युवाहरुलाई देशमा रोक्न सकेन ।
झण्डै ७० लाख नेपाली विदेशमा रहेको भनिएपनि त्यो संख्या बढेर अहिले एक करोड पुग्न लागेको छ । तर पनि यो संख्या बढाउनेभन्दा घटाउनेतर्फ कसैको ध्यान छैन । नेपाली नै भएपनि मतदानबाट बञ्चित भएका उनीहरुले यसपटक पनि मतदान गर्न पाएनन् ।
उनीहरुले पठाएको रेमिट्यान्सले देश चलेको भएपनि उनीहरुको अमूल्य मतको कदर हुन सकेको छैन । यो नै नेपालीको विडम्बना हो । हजारौँ नेपाली जुन दिन विदेश जानबाट रोकिन्छन्, त्यो दिन मात्रै देश बन्न सक्छ ।
