हेल्लो सेन्सेइ - (५३) यस्तो छ, जापानमा उपभोक्ता करको प्रावधान

टोकियो – जापानमा रहेका नेपालीहरुका लागि भिसा, यहाँको करप्रणाली, व्यवसायिक कारोवारको लेखा व्यवस्थापन र सो संग सम्बन्धित लाग्ने कर लगायतका विविध बिषयमा जानकारी होस भन्ने उद्देश्यले सुरु गरिएको स्तम्भ ‘हेलो सेन्सेइ !’ मा यसपटक हामी जापान प्रवेश पछि कर निशुल्क हुन सक्ने प्रावधानका बारेमा जानकारी गराउने प्रयास गरिएको छ । सामान्यतयाः जापानमा किनमेल गर्दा १ प्रतिशत वा ८ प्रतिशत उपभोक्ता कर तिर्नुपर्ने पर्ने हुन्छ तर विदेशी पर्यटकहरूको हकमा उपहार लगायत आफ्नो देशमा लाने किनमेलका लागि उपभोक्ता कर लाग्दैन र यसलाई कर छूट भनिन्छ ।
कर छूटको प्रक्रिया गर्न सकिने ब्यक्ति :
१. विदेशी पर्यटक
२. जापान प्रवेश गरेपछि ६ महिना भित्र काम नगरेको ब्यक्ति
३. प्रवेश पछिको ६ महिना भित्रको विदेशी बिद्यार्थीले पनि यो प्रक्रिया गर्न सक्दछन् तर आरुबाइतो गर्ने ब्यक्तिले भने यो प्रक्रिया गर्न पाउँदैनन् ।
अर्को बर्ष २०२३ को ४ महिनाबाट यो प्रक्रिया बिदेशी पर्यटकले मात्र गर्न सक्छन् भने जापान प्रवेश गरेको ६ महिना भित्रका विदेशी अन्तरराष्ट्रिय बिद्यार्थीले भने गर्न नमिल्ने हुने भएको छ ।

कर छूट प्रक्रिया गर्न मिल्ने वस्तुः
१. सामान्य सामान（General Goods） विद्युतीय वस्तुहरू (टिभी, माइक्रोवेभ ओभन, पर्सनल कम्प्युटर, अडियो आदि), घडी, लुगा, जुत्ता, झोला, सामान, गहना, भित्री वस्त्र आदि ।
२. उपभोग्य वस्तुहरू : खाना, पेय पदार्थ, औषधि, कस्मेटिक वस्तु, चुरोट आदि । कामका लागि प्रयोग गरिने वा अरूलाई बेच्ने वस्तुहरू कर छूटका लागि प्रक्रिया गर्न मिल्दैन ।
कर छूटका लागि प्रक्रिया गर्न सकिने रकम :
१. सामान्य सामानहरूको हकमा एउटै पसलमा एकै दिनमा ५ हजार येन वा सोभन्दा बढी किनमेल गर्दा
२. उपभोग्य वस्तुहरूको हकमा एउटै पसलमा एकै दिनमा ५ हजार येन वा बढीमा ५० हजार येन सम्म वा सो भन्दा कम किनमेल गर्दा ।
यो कर छूट प्राप्त गर्न सकिने अनुमति प्राप्त स्टोरमा (पसल) जानुपर्दछ । पसलका कर्मचारीहरूलाई आफ्नो राहदानी देखाउनुपर्छ । कर्मचारीले ग्राहकको विवरण इलेक्ट्रोनिक माध्यमबाट जापान सरकारलाई जानकारी गराउने छन् ।
(१) सामान्य सामानका लागि जापानमा पसलबाट प्राप्त गर्ने झोला खोलेर प्रयोग गर्न सक्नुहुन्छ तर तपाई जापानबाट फर्कदा यसलाई आफ्नो देशमा फिर्ता लैजानुपर्ने हुन्छ ।
(२) उपभोग्य वस्तुहरूका लागि भने जापानमा हुँदा पसलको झोला खोल्न पाइने छैन । किनमेल गरेपछि जापान ३० दिन भित्र छोड्नुपर्छ र आफ्नो देशमा फिर्ता लैजानुपर्छ ।
(३) कर छूट भएका वस्तुहरू जापानमा अरूलाई दिन वा बेच्न पाईनेछैन । यदि जापान छोड्दा, कर छूटको प्रक्रिया गरिएका वस्तुहरू आफूसंग नभए कर-छूट रद्द हुन्छ र उपभोग कर तिर्नुपर्दछ ।
दुई वर्ष अघिदेखि कर-छूटको प्रक्रियाहरू इलेक्ट्रोनिक अनलाईन प्रक्रियाबाट सुरू गरिएकोले जापान सरकारले कम्प्युटरद्वारा कर छूट व्यवस्थापन गरेको छ ।
केही समय अगाडिको समाचार अनुसार बिदेशी पर्यटकले जापानमा हुने चिनजानको साथीले अनुरोध गरी कर छूट प्रयोग गरी किनमेल गरेको सामान चिनजानको साथीलाई बेचेको केश बाहिर आएको थियो, यसो गर्नु सरासर अपराध हो । यसैगरी एक अर्को समाचारमा अन्तर्राष्ट्रिय बिद्यार्थीले कर छूटको सुबिधा प्रयोग गरी खरिद गरेको सामानलाई उपभोग कर थपेर जापानमा बेचेको घटना सार्बजनिक भएको थियो । यसो गरिनु पनि अपराध हो । जापान सरकारले कम्प्यूटर मार्फत कर छूटको व्यवस्थापन गर्ने हुँदा कुन ब्यक्ति कहिले जापान छोड्यो र जापान छोड्ने बेला कर छूटको सुबिधा उपयोग गरि किनेको सबै सामान ऊ संग छ कि छैन भनेर विमानस्थलमा चेकजाँच गर्न सक्दछन् ।***

Resource Person: Ogawa Bunkei
Translated by: Bishnu Tiwari
Licensed tax accountant, Gyoseisyoshi Lawyer
Email: ogawa@saitama-kaikei.net or samudra@samudrapari.com
Tel: 03-6903-8817 Mob.070-4339-4972