शुक्रबार, चैत्र १६, २०८०
Friday, March 29, 2024

काठमाडौं – नेकपा एमाले अध्यक्ष केपी शर्मा ओलीले काठमाडौँको धरहरा पछिको सबैभन्दा ठूलो भनिएको भ्यु टावरको उद्घाटन गरेका छन् । रुपन्देहीको तिलोत्तमा नगरपालिका-२ स्थित बनवाटिकामा निर्माण गरिएको १ सय ३४ फिट अग्लो १० तले भ्यु टावरको उद्घाटन पूर्वप्रधान मन्त्रीसमेत रहेका ओलीले आज गरेका हुन् ।तिलोत्तमा नगरपालिका र शकरनगर बन विहारको संयुक्त लगानीमा निर्माण भएको भ्यु टावर आर्थिक वर्ष २०७३/०७४ मा ठेक्का सम्झौता भएको थियो । ०७२ सालको भूकम्पमा ढलेको काठमाडौँको धरहरापछिको दोस्रो अग्लो र सुविधासम्पन्न भनिएको टावरको भुईँ तला ३५ सय ९५ वर्ग फिट क्षेत्रफलमा रहेको छ ।कुल २५ हजार १२२ वर्ग फिट क्षेत्रफलमा रहेको भ्यु टावरको पहिलोदेखि छैटौँ तलासम्म व्यावसायिक प्रयोजन हुनेछ भने बाँकी तलाबाट दृश्यावलोकन हुनेछ । कुल ११ करोड ५४ लाख ८१ हजार रुपैयाँको लागतमा निर्माण भएको भ्यु टावर प्राकृतिक निर्माण सेवाले बनाएको तिलोत्तमा नगरपालिकाका इन्जिनियर प्रदीप वनले बताए ।लिफ्ट सुविधा सहित बनेको भ्यु टावरमा सुविधायुक्त रेस्टुराँ र पर्यटक विश्रामस्थल, रिसर्च रुम, डिपार्टमेन्ट स्टोर, अफिस रुम, एटेज ट्वाइलेट रुम बास मिल्ने गरी वातानुकूलित कोठा, लाइब्रेरी लगायतका संरचनाहरू बनाइएको छ ।भ्यु टावरसँगै २ बिघा क्षेत्रफलमा अन्य पर्यटकीय पूर्वाधार र संरचनाहरू अहिले बनिरहेका छन् । भ्यु टावरको उत्तरतर्फ स्विमिङ पुल, अगाडि म्युजिकल फाउन्टेसन निर्माण भइरहेको छ ।चाइल्ड पार्क र स्टेडिएम निर्माणको काम पनि सुरु भइसकेको छ । बाँकी संरचना निर्माण पनि अबको २ वर्षमा सम्पन्न हुने उनको भनाइ छ । भ्यु टावर निर्माणको कुल बजेटको ७० प्रतिशत तिलोत्तमा नगरपालिकाले र ३० प्रतिशत शंकरनगर बन विहार तथा अनुसन्धान केन्द्रले व्यहोरेको छ ।भ्यु टावरबाट बुटवल, भैरहवा र लुम्बिनीसम्म सजिलै तथा दूरविनको प्रयोग गर्दा भारतको गोरखपुर, नौतनवासम्मका शहरहरू देख्न सकिनेछ ।

तपाईको प्रतिक्रिया