काठमाडौं – विश्वमा दैनिक अनेकन घटनाहरू भइरहेका छन् । तर, कहिलेकाहीँ हेर्दा सामान्य लाग्ने घटना नै विश्वसामु चासोको विषय बन्दछन् । अझ हाम्रो छिमेकी देश भारतमा त दैनिक अचम्मित पार्ने घटनाहरूको कमी हुँदैन ।
अहिलेसम्म प्रहरीकहाँ मानिसहरू चोरी, हत्या, लुटपाट, बलात्कार, धम्की आदी घटनाविरुद्ध केस दर्ता भएको सामान्य नै हो । तर, प्रहरी चौकीमा गाईविरुद्ध उजुरी दर्ता भएको सुन्नुभएको छ ? पक्कै पनि यो आश्चर्यलाग्दो घटना हो ।
कर्नाटक प्रहरीसँग केही दिनअघि एक यस्तै घटना आयो । जहाँ एक किसान आफ्नी गाईविरुद्ध उजुरी दिन प्रहरी चौकीमा पुगे । उजुरीमा उनले लेखेको निवेदन झन् अचम्मित पार्ने खालको थियो । उनले उजुरीमा लेखेका थिए, ‘मेरी गाईले पछिल्लो चार दिनयता दूध दिइरहेकी छैन ।’
प्राप्त खबरअनुसार यो घटना कर्नाटकको शिमोगा जिल्लाको सिदलीपूरा गाउँको हो । जहाँ गाउँमा बस्दै आएका किसान रमैय्याले केही दिनअघि हालेहोन्नुर प्रहरी चौकीमा एक निवेदन दिएका थिए ।
जब उनको निवेदन हेरे तब प्रहरी पनि चकित भए । किसानले गाईले चार दिनदेखि दूध नदिएकाले निवेदन दिन आएको बताए ।
उनले भने, ‘दैनिक घाँस खुवाउने गरेको छु । बिहान ८ बजेदेखि ११ बजेसम्म र बेलुका ६ बजेदेखि ७ बजेसम्म घाँस खुवाउँछु । तर, घाँस खुवाएपछि पनि गाईले दूध दिएन । जो की एकदमै गलत हो । तपाईँहरूले चौकीमा बोलाएर गाईलाई सम्झाएर दूध दिनका लागि राजी गराइदिनुपर्यो ।’
प्रहरीले त पहिले किसानको गुनासो सुन्यो । तर, पछि प्रहरीले यस्ता घटना सुल्झाउन नसक्ने भन्दै निवेदन फिर्ता गरेको छ ।
