बुधबार, फाल्गुण १६, २०८०
Wednesday, February 28, 2024

काठमाडौं – नेकपा एमालेका केन्द्रीय सदस्य सूर्य थापाले सार्वजनिक रूपमा दबाब वा लबिङ गरेर एमालेमा रोजेको पद नपाउने जिकिर गरेका छन् ।

पार्टीभित्र असन्तुष्ट नेता भीम रावल, घनश्याम भुसाललगायत नेतातर्फ संकेत गर्दै थापाले महाधिवेशनअघि पदाधिकारीमा उम्मेदवारी दिएर जतिसुकै तामझाम गरेपनि उनीहरूको प्रयास असफल भएको बताए ।

‘अब स्थायी कमिटी वा पोलिटब्यूरोमा पनि हुने त्यस्तै हो’, सामाजिक सञ्जालमा थापाले लेखेका छन्, ‘कमरेड केपी ओली अध्यक्ष रहेको पार्टीमा अनेक स्वार्थ समूह र गुट बनाएर त्यसरी दबाब दिन जो कोही नलाग्नु नै बुद्धिमत्तापूर्ण होला !’

चितवनमा भएको एमालेको १० औँ महाधिवेशनमा रावल, भुसाल, टंक कार्कीले पदाधिकारीमा उम्मेदवारी दिए पनि पराजित भएका थिए ।

मङ्सिर २५ र २६ मा बस्ने केन्द्रीय कमिटी बैठकले स्थायी कमिटी र पोलिटब्यूरो गठन गर्दै छ । ४५ सदस्य स्थायी कमिटी र ९९ सदस्य पोलिटब्यूरोमा पर्नका लागि नेताहरूको दौडधुप चलेको छ ।

तपाईको प्रतिक्रिया