काठमाडौं – बेलायतमा बकिंघम दरबारका अनुसार रानी एलिजाबेथ तथा प्रिन्स फिलिपले कोरोनाभाइरसको भ्याक्सिन लगाएका छन् ।
बिबिसीमा आएको समाचारअनुसार रानी एलिजाबेथले आफूले भ्याक्सिन लगाएको कुरा सबैलाई जानकारी दिन अनुरोध गरेकी थिइन् । उनले विभिन्न अड्कलबाजी नहोस् भनेर यो विषयमा जानकारी दिन सचिवालयलाई बताएकी हुन् ।
उनी ९४ वर्षकी भएकी छिन् । त्यस्तै, प्रिन्स फिलिप ९९ वर्षका भएका छन् ।
बेलायतमा १५ लाख मानिसहरुले अहिलेसम्म कोरोना भ्याक्सिनको पहिलो डोज लगाइसकेका छन् ।
पछिल्लो २४ घन्टामा बेलायतमा कोरोनाभाइरस संक्रमित थपिएपछि ३० लाखभन्दा धेरै संक्रमित पुगेका छन् । त्यस्तै बेलायतमा ८० हजारले कोरोनाका कारण ज्यान गुमाएका छन् ।
