काठमाडौं – मान्छेको तालुमा आलु फलेपछि कसको के लाग्छ र ? यो दुनियाँमा अर्ब रुपैयाँ कमाउने भन्ने कुरा धेरैका लागि सपना मात्र हुनसक्छ । तर भाग्य हुनेलाई चाहिँ एक दुई अर्ब रुपैयाँ मात्र होइन १८ अर्ब रुपैयाँ चिट्ठामा पर्दो रहेछ ।
सुन्दैमा सपना जस्तो लाग्ने यो घटना भएको छ, बेलायतमा । बेलायतमा एकजना मानिसले झण्डै १८ अर्ब रुपैयाँ बराबरको रकम चिट्ठामा जितेका छन् । बेलायतको द नेशनल लटरीमा टिकट खरीद गरेका ती मानिसलाई झण्डै १८ अर्ब रुपैयाँ बराबरको रकम चिट्ठा परेपछि उनले इतिहास नै रचेका हुन् । नाम सार्वजनिक नगरिएका ती व्यक्ति बेलायतमा चिट्ठामा सबैभन्दा धेरै रकम जित्ने तेश्रो मानिस बनेका छन् ।
अंकको आधारमा जितिने लट्री थियो त्यो । यसपटक चिठ्ठा जित्ने अंक २०, २३, २८, ३० र ४४ नम्बर पर्यो र भाग्यशाली स्टार्स अंक ०३ र ०७ घोषित गरियो । यसअघि बेलायतमा सन् २०११ मा एकजना व्यक्तिले २४ अर्ब रुपैयाँ बराबरको रकम चिट्ठामा जितेका थिए । त्यस्तै सन् २०१२ मा अर्का एक व्यक्तिले २२ अर्ब रुपैयाँ बराबरको रकम चिट्ठा पार्न सफल भएका थिए । -एजेन्सीको सहयोगबाट
