काठमाडौं – युरोपियन च्याम्पियन्स लिग फुटबलमा मंगलबार राती म्यान्चेस्टर सिटी र टोटनह्याम हट्सपर विजयी भएका छन् ।
इङ्लिस क्लब म्यान्चेस्टर सिटीले युक्रेनको शख्तरलाई २-० ले हराउँदा अर्को इङ्लिस क्लब टोटनह्याम हट्सपरले साईप्रसको अपोईल निकोसियालाई ३-० ले पाखा लगायो ।
लिभरपुलले भने रुसको स्पार्टा मस्कोसँग १-१ गोलको बराबरीमा चित्त बुझायो । युएफा च्याम्पियन्स लिगकै अर्को खेलमा स्पेनिस क्लब रियाल मड्रिडले जर्मनीको बोरुसिया बर्डमण्डलाई उसैको मैदानमा ३-१ ले हरायो ।
अर्को स्पेनिस टोली सेभियाले स्लोभेनियाको मारिबोरलाई ३-० ले पराजित गर्यो ।
यसैगरी ईटालीको नापोलीले नेदरल्याण्ड्सको फेयनुर्डलाई ३-१ ले हराउँदा टर्कीको बेसिक्टासले जर्मनीको आर.बी. लेप्जीगलाई २-० ले तथा पोर्चुगलको एफ.सी पोर्टोले फ्रान्सको मोनाकोलाई उसैको मैदानमा ३-० ले पाखा लगायो ।
युरोपियन च्याम्पियन्स लिग फुटबलअन्तर्गत समुह ए देखि डि सम्मका ८ खेल आज राती हुनेछन् ।
