टोकियो – लामो समयदेखि जापानलाई कर्मथलो बनाउँदै आएकी गायिका सारा पुन र हिरा बुढाथोकीको स्वरमा सजिएको ’आँशुको मुल फुट्ने पक्का भो’ बोलको म्युजिक भिडियोको हालै जापानमा विमोचन भएको छ ।
उक्त म्युजिक भिडियोको गत आइतवार योकोहामामा आयोजित एक समारोहका बीच ब्यवसायी तथा समाजसेवी ददिवल खड्काले विमोचन गरेका हुन् ।
सो अवसरमा बोल्दै पत्रकार तिलक मल्लले प्रवासको असहज परिस्थितिमा पनि साँगीतिक साधनालाई निरन्तरता प्रदान गर्दै नेपाली गीत, संगीत एवं कला र सँस्कृतिको श्रीबृद्धिमा पुर्याएको योगदान सह्रानीय रहेको बिचार ब्यक्त गरे । यसैगरी मगर संघ जापानका वरिष्ठ सल्लाहकार गमप्रसाद जुग्जालीले गायिका पुनको साँगीतिक यात्राको उत्तरोत्तर प्रगति र थप सफलताको कामना गर्दै उक्त म्युजिक भिडियोमा मौलिक लोकबाजा र जनवीवनमा आधारित यथार्थ कथावस्तु चित्रण गरिएको धारणा ब्यक्त गरे । सो अवसरमा बोल्दै गायिका पुनले साँगीतिक यात्राको पहिलो सिर्जनाका रुपमा बजारमा आएको म्युजिक भिडियो हेरेर, सुनेर र रचनात्मक सुझाव तथा प्रतिक्रिया दिएर सहयोग गर्न समस्त शुचचिन्तकहरुमा अपील गरिन् । उनले उक्त ब्यूजिक भिडियो निर्माण कार्यमा सहकार्य गर्ने नन्द राना, शिव पाईजा, डम्वर गर्बुजा लगायतका सबै सहयोगीहरुलाई धन्यबाद ब्यक्त गरिन ।
पञ्चेबाजामा आधारित दोहोरीको उक्त म्युजिक भिडियो हालै मात्र युट्युमार्फत सार्बजनिक भएको हो ।
लय शब्द खेम पुनको, गणेश सापकोटाको छायाङ्कन र तारानाथ आचार्यको निर्देशन रहेको उक्त म्युजिक भिडियोलाई कञ्चन सुशिल म्युजिक प्रालिले बजारमा ल्याएको हो । म्युजिक भिडियोमा इश्वर सिंह र अनिता परियारको अभिनय रहेको छ ।
स्कुले जीवनदेखि नै गीत, संगीतमा असाध्यै लगाव रहेको बताउने गायिका पुनले त्यतिबेलैदेखि बिभिन्न साँगीतिक कार्यक्रमहरुमा भाग लिने गरेको बताईन् । बैदेशिक रोजगारीको सिलसिलामा जापान आएपछि पनि यहाँ हुने साना ठुला साँगीतिक कार्यक्रमहरुमा भाग लिएर लोक तथा दोहोरी गायनमा उनले आफ्नो छुट्टै परिचय बनाईसकेकी छन् । दोहोरीको रस्साकस्सीमा भाकामा भाका हालेर सवाल जबाफ गर्न उनी माहिर मानिन्छन् ।
स्मरण रहोस् जापानबाट एकपछि अर्को गर्दै सांगीतिक सिर्जनाहरु प्रस्फुटन हुने क्रम जारी छ ।***
