काठमाडौं – स्वास्थ्य मन्त्री गगन थापाले नसर्ने रोगको जोखिम नियन्त्रण ‘पेन प्याकेज’ कार्यक्रम थप ८ जिल्लामा लागू गर्ने तयारी भइरहेको जानकारी दिनुभएको छ । यसअघि स्वास्थ्य मन्त्रालयले कैलाली र इलाममा सुरु गरेको यो कार्यक्रमलाई थप ८ जिल्लामा लागू गर्न लागिएको उहाले ट्विटरमार्फत जानकारी दिनुभएको हो । 
यो कार्यक्रम पाल्पा, बाग्लुङ, म्याग्दी, अछाम, बर्दिया, सुर्खेत, मकवानपुर र रौतहटमा पनि सञ्चालन गर्ने उहाले जानकारी दिनुभयो ।
‘यसबर्ष इलाम र कैलाली दुई जिल्लामा सुरु गर्ने र आगामी पाँच बर्ष भित्रमा ५ सय स्थानबाट सेवा दिने पूर्व योजनालाई खारेज गर्दै यसैबर्ष ५ सय स्थानबाट यो कार्यक्रम सुरु गर्ने भन्दा महत्वाकांक्षी योजनाको रुपमा हेरिएको थियो तर अहिले त्यसका लागि आवश्यक तयारी पूरा भई कार्यान्वयन चरणमा पुगेको छ’ थापाले ट्विटरमा भन्नुभएको छ । विश्व स्वास्थ्य संगठनको प्रतिवेदन अनुसार नेपालमा सन् २०१० मा नसर्ने रोगबाट मृत्यु हुनेको संख्या ५१ प्रतिशत रहेको थियो तर सन् २०१४ मा पुग्दा यो प्रतिशत बढेर ६० पुगेको छ ।
संसारमै तीब्र रुपमा बढ्दै गएको नसर्ने रोगको जोखिम न्युनीकरण गर्न विश्व स्वास्थ्य संगठनले यो कार्यक्रम अघि सारेको हो । यो कार्यक्रममा नसर्ने रोगको जोखिम न्युनीकरणका उपाय, रोकथाम र उपचार लगायतको प्याकेज रहेको छ ।
