आजकल युवावर्गमा भ्यालेन्टाइन्स डे विशेष महत्वको हुन थालेको छ । यो दिन हरेक व्यक्ति केही फरक र विशेष देखिन चाहन्छन् । जो–कोही पनि आकर्षक, स्मार्ट लुक्स बनाएर आफ्नो प्रेमीलाई इम्प्रेस गर्न चाहन्छन् । भ्यालेन्टाइन्स डेमा पर्फेक्ट मेकअपमा आकर्षक लुक्स देखिएर आफ्नो आत्मविश्वास बढाउन सकिन्छ । भ्यालेन्टाइन्स डेमा गर्न सकिने मेकअपबारे ब्युटिसियन सबी श्रेष्ठका सुझाब यस्ता छन्ः
—सामान्य तथा आकर्षक अनुहार भएका युवती अधिकांश पुरुषले मन पराउँछन् । क्युट अनुहार देखिन चाहनेले फाउन्डेसनको प्रयोग गर्नु राम्रो हुन्छ । यो अनुहारमा सजिलै तरिकाले समावेश हुन्छ । गालालाई हलुका गुलाबी देखाउन हातले हल्का ब्लस लगाउनुपर्छ । आँखालाई क्लासिक लुक्स देखाउन कालो आइलाइनर प्रयोग गर्न सकिन्छ । मस्कारा लगाउन भने भुल्नु हुँदैन । चहकिलो गुलाबी रङको लिपस्टिकले थप आकर्षक देखाउँछ । यति मात्र मेकअप गर्दा पनि जो–कोही युवतीको भ्यालेन्टाइन मेकअप पूर्ण हुन्छ ।
—यदि तपाईं बोल्ड लुक्स देखिन चाहनुहुन्छ भने अनुहारमा मिल्ने फाउन्डेसन लगाउनुपर्छ । फाउन्डेसन वाटरप्रुफ भए झन् उत्तम हुन्छ । जसले गर्दा दिनभर नै मेकअप बहने तथा बिग्रने सम्भावना हुँदैन । यसका साथै वाटरप्रुफ मस्कारा तथा आइलाइनर पनि उपयोग गर्न सकिन्छ । ओठमा पनि हलुका गुलाबी लिपस्टिक लगाउनुपर्छ । नत्र, ओठलाई केही चम्किलो मात्र देखाउने लिप ग्लस पनि लगाउँदा राम्रो हुन्छ ।
—फ्लर्टी फन लुक्स अहिले निकै प्रचलनमा छ । त्यसैले आँखाको विशेष मेकअप गर्ने तथा मस्कारा सही तरिकाले माथिल्लो परेलाको तल र माथि दुवैतर्फ लगाएर यस्तो लुक्स देखिन्छ ।
—कालो रङको आइलाइनर प्रयोग गर्ने । आँखाको कुनाबाट आइलाइनरको पखेटाजस्तो निकाल्ने । यसले अनुहारमा फरक आकर्षक लुक्स दिन्छ । क्रिम फाउन्डेसनलाई अनुहारमा एकै तरिकाले लगाएर रातो रङको लिपस्टिक लगाउने । यस्तो लुक्समा प्रेमीको नजर तपाईंको मुहारबाट अन्त जाने सम्भावना कम हुन्छ ।
