गोरखा – हरमटारीस्थित खेलकुद मैदानमा आजदेखि नवौँ गोरखा महोत्सव सुरु भएको छ ।
प्रधानमन्त्री पुष्पकमल दाहाल प्रचण्डले महोत्सव उद्घाटन गर्दै गोरखा–आँबुखैरेनी सडकको दायाँबायाँ २५ मिको सट्टा १५ मि लागु गर्न, मनास्लु पदमार्ग पुनःनिर्माण गरी व्यवस्थित बनाउन तथा बाह्रसय मेगावाट क्षमताको बूढीगण्डकी जलविद्युत् आयोजना प्रभावित बासिन्दालाई तत्काल मुआब्जा वितरण गरी केही महिनामा आयोजनाको शिलान्यास गर्न आफूले सक्दो पहल गर्ने प्रतिबद्धता व्यक्त गर्नुभयो ।
सो अवसरमा ऊर्जामन्त्री जनार्दन शर्माले देशभर विद्युत्भार कटौतीमुक्त क्षेत्र बनाउने अभियान जारी रहने बताउनुभयो । गोरखामा पर्यटक भित्र्याउने उद्देश्यले आयोजना गरिएको महोत्सवमा कृषि र तस्बिर प्रदर्शनी तथा खाना उत्सव पनि गरिएको छ ।
महोत्सवमा ८५ कक्ष छन् । उद्घाटनका अवसरमा बिनाअक्सिजन चोयूलगायत हिमाल आरोहण गरेकी उत्तरी गोरखा, छेकम्पार–५ की फुन्जो लामालाई सम्मान गरिएको थियो ।
