काठमाडौं – रियल मड्रिडका क्रिष्टियानो रोनाल्डोले फ्रान्सेली फुटबल म्यागजिनले प्रदान गर्ने बालोन डी’ओर अवार्ड हात पारेका छन् । रोनाल्डोले बार्सिलोनाका लियोनल मेस्सीलाई पछि पार्दै बालोना डी’ओर २०१६ अवार्ड जितेका हुन् । पोर्चुगलका रोनाल्डोले योसँगै चार पटक बालोन डी’ओर जितेका छन् । 
मेस्सीले गएको वर्ष पाँचौं पटक बालोन डी’ओर जितेका थिए । एथ्लेटिको मड्रिडका फ्रान्सेली खेलाडी एन्टोनी ग्रिजम्यान तेस्रो स्थानमा रहे । फ्रान्सेली फुटबलले जुरी तथा विश्वका एक सय ७३ खेल पत्रकारको मतको आधारमा अवार्ड प्रदान गरेको हो । रोनाल्डोले गएको सिजन रियल मड्रिडलाई च्याम्पियन्स लिग तथा पोर्चुगललाई युरोकप २०१६ को उपाधि दिलाउन महत्वपूर्ण भूमिका खेलेका थिए ।
फ्रान्सेली फुटबल म्यागजिनले सन् १९५६ देखि अवार्ड प्रदान गर्दै आएको हो । तर गएको ६ सिजन विश्व फुटबलको प्रशासकीय निकाय फिफासँगको सहकार्यमा फिफा बालाने डी’ओर प्रदान गरिँदै आएको थियो । यस्तै फिफाले पनि आउँदो जनवरी ९ मा वर्ष खेलाडी अवार्ड प्रदान गर्दैछ । रोनाल्डोले सन् २००८, २००९, २०१३ र २०१४ मा पनि बालोन डी’ओर जितेका थिए । मिलानमा भएको अवार्ड वितरण समारोहमा रोनाल्डोले भने ‘चार पटकसम्म गोल्डेन बल जित्छु भन्ने मैले सोचेकै थिइन ।
म धन्य भएको छु, जसले मलाई यो व्यक्तिगत अवार्ड जित्न सहयोग गर्नु भयो उहाँहरुप्रति ।’रोनाल्डोले गएको सिजन क्लब र राष्ट्रिय टिमबाट गरी ५४ गोल गरेका थिए । उनले यो सिजन क्लब र राष्ट्रिय टिमबाट गरी २० खेलमा १९ गोल गरिसकेका छन् । दोस्रो स्थानमा चित्त बुझाएका मेस्सीले गएको सिजन उत्कृष्ट प्रदर्शन गरेका थिए ।
तर पनि उनी राष्ट्रिय टिमलाई महत्वपूर्ण उपाधि दिलाउनबाट भने अन्तिम समयमा चुके । मेस्सीले सन् २०१६ मा ५० खेलमा ५० गोल गरिसकेका छन् ।
