काठमाडौं – अनुसन्धानकर्ता महावीर पुनले स्थापना गर्न लागेको राष्ट्रिय आविस्कार केन्द्रलाई भूतपूर्व बेलायती सैनिकहरुले देउसी खेलेर जम्मा पारेको रु दुई लाख आर्थिक सहयोग गरेको छ । प्रथम र दोस्रो विश्वयुद्धमा ज्यान गुमाएका नेपाली सेनाको सम्झनामा आज आयोजना गरिएको ‘पप्पी डे’ का अवसरमा भूतपूर्व बेलायती सैनिक संघ र पुन समाज काठमाडौँ जिल्ला कार्यसमितिले रु एक÷एक लाख आर्थिक सहयोग गरेका हुन् ।
संघले प्रथम र दोस्रो विश्वयुद्धमा ज्यान गुमाएका नेपाली सेनाको सम्झनामा अङ्ग्रेजी समयअनुसार आज ११ महिना ११ गते ११ बजे ११ मिनेट ११ सेकेन्डमा उक्त कार्यक्रम गरेको थियो । सो कार्यक्रममा संघले तिहारमा खेलेको देउसी भैलोबाट उठेको रकम आविस्कार केन्द्रलाई सहयोग गरेको हो ।
कार्यक्रममा संघका अध्यक्ष जनक रानाले राष्ट्रका लागि केही गर्ने अभियानका साथ लाग्नु भएकाले पुनलाई आर्थिक सहयोग गरिएको बताउनुभयो । उहाँले भन्नुभयो– ‘हामीजस्ता संस्थाको सानो रकमले आविस्कार केन्द्र खोल्न सहयोग पुग्छ भने हामीले सहयोग किन नगर्ने ?’
अनुसन्धानकर्ता पुनले देशको आर्थिक विकासका लागि सानातिना सहयोगको खाँचो रहेको भन्दै आफ्नो अभियान सम्पन्न गर्न ५० करोड रकम आवश्यक रहेको बताउनु भयो ।
