काठमाडौं – कानुन, न्याय तथा संसदीय मामिलामन्त्री अजयशंकर नायकले सरकारको कामबारे प्रश्न गर्ने ठाउँ नभएको बताउनुभएको छ । सोमबार रिपोर्टर्स क्लब नेपालले आयोजना गरेको साक्षात्कारमा बोल्दै मन्त्री नायकले सरकारको कामबारे एक प्रतिशत पनि आलोचना गर्ने ठाउँ नभएको बताउनुभयो ।
‘सरकारको बारेमा अहिले एक प्रतिशत पनि प्रश्न गर्ने ठाउँ छैन, हामीले राम्रो काम गरेका छौं, संविधान कार्यान्वयनको लागि काम भएको छ, उच्च अदालत गठन भएको छ’ उहाँले भन्नुभयो ‘कसैले भाँडभैलो र मजा लिनको लागि सरकारको बारेमा कमेन्ट गर्दा मुलुकलाई नै घाटा हुन्छ ।’
त्यस्तै उहाँले अहिले चार विवादित विषयहरु प्रदेशको सिमांकन, नागरिकता, भाषा र राष्ट्रिय सभाको प्रतिनिधित्वमा राष्ट्रिय सहमति जुटाएर संविधान संशोधनको प्रस्ताव छिट्टै संसदमा पेश गर्ने बताउनुभयो । मन्त्री नायकले विवादित विषयहरुमा सरकारले साझा मिलनबिन्दु खोजिरहेको उल्लेख गर्दै प्रमुख दलहरुबिच राष्ट्रिय सहमती जुटाएर चाँडो भन्दा चाँडो संसोधन प्रस्ताव संसदमा दर्ता गराउने बताउनुभयो ।
त्यस्तै सरकारले अंगीकृत नागरिकता लिएकालाई राष्ट्रपति वा प्रधानमन्त्री बनाउने गरी संविधान संशोधनको प्रस्ताव ल्याउन लागेको भनेर गलत प्रचार गरेको बताउँदै उहाँले भन्नुभयो ‘सरकारले आधिकारिक रुपमा यसबारेमा केही बोलेको छैन, यो त अन्तरिम संविधानमा पनि उल्लेख गरिएको छैन, धारा १५५ मा यो बारेमा प्रष्ट व्यवस्था गरिएको छ ।’
मन्त्री नायकले सिमांकनको विवाद हल गर्न संघीय आयोग गठन गर्ने र त्यसले अघि सारेको रिपोर्टलाई आधार मानेर अघि बढ्ने विषयमा छलफल भएको पनि बताउनुभयो ।
