काठमाडौं– महारथी टोली बार्सिलोनाले स्पेनिस नकआउट फुटवल प्रतियोगिता कोपा डेल रे अन्तर्गत क्वाटरफाइनल चरणको पहिलो लेगमा एथ्लेटिको बिल्वाओलाई दुई एक गोलले पराजित गरेको छ । जितसंगै बार्सिलोना प्रतियोगिताको क्वाटरफाइनल नजिक पुगेको छ ।
गएराति घरेलु मैदानमा एथ्लेटिको विल्वाओले खेल बार्सिलोनालाई दुई एक गोलले सुम्पन बाध्य भयो । चोटग्रस्त स्टार स्ट्राईकर लियोनल मेसी र दुई खेलको प्रतिबन्धमा रहेका अर्का स्टार लुईस स्वारेजबिना मैदानमा उत्रिएको पाहुना टोली बार्सिलोनाका लागि नेईमार र मुनिरर्ले एक एक गोल गरे । खेलको १८ औं मिनेटमै इभान राकिटिकको पासमा मुनिरले बार्सिलोनालाई अग्रता दिलाए । त्यसको ६ मिनेटपछि नै स्टार स्ट्राइकर नेईमारले बार्सिलोनाको अग्रता दोव्वर बनाए ।
पहिलो हाफमा दुई शून्य गोलको अग्रता बनाएको बार्सिलोनाले दोस्रो हाफमा गोल थप्न सकेन । बरु खेलको अन्त्यतिर गोल खान पुग्यो । ८९ औं मिनेटमा घरेलु टोलीका लागि एडुरिजले गोल गरेपछि विल्वाओले हार टार्न सकेन । दुईबीचको दोस्रो लेग बार्सिलोनाको मैदान नाउक्याम्पमा हुनेछ ।
अर्को खेलमा उपाधिको अर्को दावेदार एथ्लेटिको म्याड्रिडले भने सेल्टा डि भिगोसंग गोलरहित बराबरी खेल्यो । सेमिफाइनल प्रबेशका लागि एथ्लेटिकोले अर्को साता हुने दोस्रो लेगमा घरेलु मैदानमा जित्नै पर्ने भएको छ ।
