काठमाडौं– उपप्रधानमन्त्री वामदेव गौतमले वसन्तपुर दरबार तथा त्यस आसपास क्षेत्रका भूकम्पबाट क्षतिग्रस्त सम्पदाका बहुमूल्य सामग्री संरक्षण गर्न निर्देशन दिनुभएको छ ।
गत वैशाख १२ गतेको भूकम्प र त्यसपछिका ठूला पराकम्पनका कारण वसन्तपुर दरबार क्षेत्रका प्राचीन महत्वका सम्पदा क्षतिग्रस्त भएका छन् । भत्किएका पुरातात्विक महत्वका सम्पदाको निरीक्षणका क्रममा गृहमन्त्री गौतमले क्षतिको जानकारी पनि लिनुभयो ।
यसैगरी सामान्य प्रशासनमन्त्री लालबहादुर पण्डितले पनि त्यस क्षेत्रको निरीक्षण गर्नुभयो । शुक्रबार नै त्यस क्षेत्रमा नेपाली सेना, प्रहरी तथा नेकपा (एमाले) का स्वयम्सेवकले भग्नावशेष पन्छाउने कार्यमा सहयोग गरेका थिए । भूकम्पपछि त्यस क्षेत्रमा अधिकांश सम्पदा पूर्णरुपमा क्षति भएका छन् भने कतिपय नभत्किएका संरचनासमेत जोखिममा छन् ।