मेलम्ची– गत वैशाख १२ गते गएको विनाशकारी भूकम्पपछि उद्धार तथा राहत वितरणको अनुगमनका लागि विपद् व्यवस्थापन तथा संसदीय अनुगमन विशेष समिति आइतबार सिन्धुपाल्चोकको मेलम्ची पुगेको छ ।
सभासद् रेखा शर्माको संयोजकत्वमा भानुभक्त ढकाल र जीवनबहादुर शाही सदस्य रहेको तीन सदस्यीय टोलीले आइतबार मेलम्चीस्थित भीमकाली गुल्मबाट भएको राहत र उद्धारका बारेमा जानकारी लिएको गुल्मपति सेनानी प्रेम हमालले जानकारी दिनुभयो ।
सो अवसरमा गुल्मपति हमालले क्षेत्रमा भएको उद्धार, राहत वितरणको अवस्थाबारे जानकारी गराउनुभएको थियो । यसअघि टोलीले क्षेत्र नंं १ र २ को अवस्था बुझी आइतबार क्षेत्र नं ३ आइपुगेको हो । केही दिनअघि व्यवस्थापिका–संसद्ले प्रभावित क्षेत्रमा संसदीय टोली खटाउने निर्णय गरेको थियो ।