चितवन– जिल्लालाई खुला दिसामुक्त क्षेत्र घोषणा गरे पनि खुला चौरमा शौच गर्न बाध्य चितवनको विकट लोथर गाविसका चेपाङहरुले अहिले भने शौचालय प्रयोग गर्न पाएका छन् । यस्तै गाउँका टोलटोलमा खानेपानीको सुविधा पनि उपलब्ध भएको छ । खानेपानी र शौचालय प्रयोग गर्न पाएपछि कान्द्राङगढीका चेपाङ खुसी भएका छन् ।
खानेपानी आयोजना उपभोक्ता समितिका अध्यक्ष मानबहादुर प्रजाले पोषण, खानेपानी तथा सरसफाइ आयोजनाअन्तर्गत घर–घरमा पानी आएकामा खुसी व्यक्त गर्नुभयो । उहाँले काममा निकै सहज भएको र घर, गाउँ, केटाकेटी सफा राख्नसमेत सहयोग पुगेको बताउनुभयो ।
पानी अभावमा चेपाङहरुको स्वास्थ्य स्थिति नाजुक देखिएपछि आयोजनाअन्तर्गत रु ३० लाख ५० हजारको लगानीमा तीन वटा वडाका ४३ घरधुरीलाई खानेपानीको व्यवस्था गरिएको छ । प्रत्येक घरमा शौचालय निर्माणका लागि आवश्यक भौतिक सामग्री प्रदान गरिएकोे छ ।
शुद्ध खानेपानीका लागि पुजवुङमा पानी सङ्कलन ट्याङ्की निर्माण गरी २६ वटा धारामार्फत घर–घरमा पानी पुर्याइएको छ । आयोजना सम्पन्न गर्न स्थानीयस्तरमै उपभोक्ताको समिति निर्माण गरिएको थियोे । खानेपानी संरक्षणका लागिसमेत समितिले नै काम गर्नेछ ।
यो योजनाबाट चेपाङ समुदायका २८६ जनसंख्या प्रत्यक्ष लाभाविन्त भएका छन् । खानेपानी र शौचालयजस्ता भौतिक निर्माणका कामसँगै स्वयम्सेवक, सेविकाहरु परिचालन गरी स्वस्थ्य कसरी रहने र सरसफाइ कसरी गर्ने भन्ने विषयमा तालिमसमेत दिइएको लोथर गाविस सचिव कुलप्रसाद आचार्यले बताउनुभयो ।