टोकियो – टोकियोमा बिशेष भेटघाट, शुभकामना आदानप्रदान, र साँगीतिक माहौलकाबिच नेपाली नयाँ वर्ष २०७१ मनाईएको छ ।
टोकियोमा रहेका नेपालीहरु एकैठाउँमा भेला भएर नयाँ वर्ष मनाउने अवसर भने एनआरएन आइसीसीका उपाध्यक्ष एवं टीबीआई ग्रुपका अध्यक्ष भवन भट्टले मिलाउनुभएको हो ।
टोकियो सेतागाया कोमाजावा दाइगाकुस्थित भट्टनिवासमा भएको सो नयाँ वर्ष कार्यक्रममा कार्यवाहक राजदूत तापस अधिकारीले जापानबासी नेपालीहरुमा नयाँ वर्षको शुभकामना ब्यक्त गर्नुभयो । यसैगरी बिशेष उपस्थितिकारुपमा हास्यकलाकार मनोज गजुरेल र गायिका कोमल वलीले पनि नयाँ वर्षको शुभकामना ब्यक्त गर्नुभयो । यसअघि उपस्थित सबैमा हार्दिक स्वागत गर्दै आयोजकका तर्फबाट आइसीसी उपाध्यक्ष श्री भट्टले नयाँ वर्षको शुभकामना ब्यक्त गर्नुभयो । यसैगरी जापानबासी नेपालीहरुका तर्फबाट एनआरएन जापानका अध्यक्ष पारसमणि पोखरेलले पनि नयाँ वर्षको शुभकामना ब्यक्त गर्नुभएको थियो ।
शुभकामना मन्तब्यकाक्रममा गायिका एवं सञ्चारकर्मी कोमल वलीले भनिन् – ‘आज नयाँ वर्ष बैशाख १ गतेकै दिन मेरो जन्म दिन पनि हो, आजदेखि मैलै आफ़्नो सवारीसाधनमा अत्यावश्यक बेलामा बाहेक हर्न बजाउने छैन, नयाँ वर्षमा मुलुक र मुलुकबासीको हितमा सबैले एउटा मात्र भए पनि राम्रो काम गर्ने प्रण गर्न सकौं ।’
यसैगरी अर्का कलाकार मनोज गजुरेलले जापानी संस्कृतिमा पाईने असाध्यै राम्रो आदरभाव र सहयोगी भावना आफुले पनि अनुसरण गर्ने नयाँ वर्षको अवसरमा प्रण गर्नुभयो । एनआरएन जापानका अध्यक्ष पारसमाणि पोखरेलले आगामी अक्टोबर महिनामा एनआरएनको क्षेत्रीय सम्मेलन नागानोकेनको तातेसिनामा गरिने जानाकारी गराउनुभयो ।
मैत्रिपूर्ण रात्रीभोजसहितको नयाँ वर्षको बिशेष जमघटमा जापानका बिभिन्न संघसंस्थाका प्रतिनिधि, बुद्धिजीवी, बिद्यार्थी, ब्यवसायी, समाजसेवी, सञ्चारकर्मी एवं बैदेशिक पाहुनाहरुको समेत उत्साहजनक उपस्थिति रहेको थियो ।
सो अवसरमा गायिका कोमल वलीको जन्मदिन पनि सामुहिकरुपमा मनाईएको थियो भने मनोज गजुरेलको हास्यप्रस्तुती र गायिका वलीसंगको दोहोरीका साथै अन्य साँगीतिक प्रस्तुतीमा सहभागीहरुले मनोरञ्जन लिएका थिए ।
ठूलो सँख्याका नेपालीहरु एकैठाउँमा भेला भएर नयाँ वर्ष मनाउन पाएकोमा सहभागीहरु सबै खुशी देखिन्थे ।**** तस्विर : सन्दिप ढुंगाना
