धनुषामा अनौठो किसिमले आगलागी

जनकपुरधाम– धनुषा जिल्लाको ठिल्ला गाविसमा गत एक सातादेखि अनौठो किसिमले आगो लाग्ने गरेको पाइएको छ ।

बिहान ८ बजेदेखि राति १० बजेसम्म खासगरी परालको (थुप्रो)टौवामा आफैँ लाग्ने गरेको आगोले आम जनता त्रसित भएका छन् ।

स्थानीय सन्तोष साहका अनुसार, बिहानैदेखि गाविसमा त्रासको वातावरणले जनजीवन कष्टमय बनेको छ । दैविक प्रकोप हो वा अन्य, यसबारे आजसम्म कुनै पत्ता नलागेको बताउँदै उहाँले त्रासमय वातावरणको अन्त्यका लागि सरकारी तथा गैरसरकारी निकायको ध्यान जानुपर्ने खाँचो औंल्याउनुभयो ।

इलाका प्रहरी कार्यालय सबैलाका अनुसार, प्रहरीको उपस्थिति रहँदा पनि अनौठो किसिमले आगो लाग्ने गरेको छ । आगलागीका कारण करिब एक लाख बराबरको क्षति भएको पनि प्रहरीले पुष्टि गरेको छ ।

स्थानीय साहले भन्नुभयो– “प्रहरीको गस्ती रहेकै बेलामा पनि आगो लागेका कारण रहस्य पत्ता लगाउन गाह्रो भइरहेको छ ।”