बरिष्ठ गीतकार अधिकारीको निधन

काठमाडौं- बरिष्ठ गीतकार तथा कवि क्षेत्रप्रताप अधिकारीको निधन भएको छ ।

अधिकारीको हृदयघातका कारण ७२ वर्षको उमेरमा निधन भएको हो । शनिवार राति हृदयघात भएपछि उनलाई सहिद गंगालाल हृदयरोग केन्द्रमा भर्ना गरिएको थियो ।

वि स १९९९ चैत मा तनहुँको मिर्लुङ गाविसको ज्यामरुक कथापानीमा जन्मिएका अधिकारीका रहर लागेर, पहाड देखि पहाड सम्म, फेरि एउटा परिवर्तन, तर देश रहिरहेछ लगायतका कृति प्रकाशित छन् । उनका ‘म त लालीगुराँस भएछु’ सहितका धेरै गीत चर्चित छन् ।

अधिकारी पञ्चायतकालमा सहायक शिक्षामन्त्री समेत भएका थिए । उनका दुई छोरा छन् । ***