जनताको सूसुचित हुन पाउने अधिकार कुण्ठित हुनु हुँदैनः मन्त्री रिजाल

काठमाडौँ- सूचना तथा सञ्चारमन्त्री डा मीनेन्द्र रिजालले जनताको सूसुचित हुन पाउने अधिकारको रक्षा र प्रवद्र्धन गर्ने दायित्वबाट सरकार पछि नहट्ने बताउनुभएको छ ।

ब्रोडकास्टिङ एसोसिएसन अफ नेपाल (बान) को दसौं वार्षिक साधारणसभाको आज यहाँ उद्घाटन गर्दै मन्त्री रिजालले जनताको सूसुचित हुन पाउने अधिकार कुण्ठित हुन नदिन सरकारको तर्फबाट आवश्यक सहयोग हुने स्पष्ट गर्नुभयो ।

सञ्चार क्षेत्रसँग सम्बन्धित समस्यालाई सबै पक्षको सहकार्यमा समाधान गर्न सरकार तयार रहेको भन्दै उहाँले त्यसका लागि विद्यमान सञ्चार नीति र कानुनमा परिमार्जन गर्न सकिने जनाउनुभयो ।

मन्त्री रिजालले भन्नुभयो, “मन्त्रालयमा ज्ञापनपत्र र मागपत्र लिएर होइन समस्याको समाधानका लागि सुझावपत्र पनि लिएर आउनुस्, सहकार्य गरेर समाधान गरौं ।”