काठमाडौं– उद्योग मन्त्री कर्णबहादुर थापाले सही रुपमा लाग्ने हो भने आगामी विस वर्षमा प्रत्येक नेपाली अहिलेको युरोपेली मुलुकको दाँजोमा पुग्ने दावी गरेका छन् ।
उनले संवाद डवलीले आयोजना गरेको साक्षात्कार कार्यक्रममा भने, ‘नेपाल संभावना भएको देश हो, यहाँको हरेक पुजी उत्पादनका क्षेत्रमा लगानी गर्न जरुरी छ ।’
नेपाली पुजी अनुत्पादक क्षेत्रमा लगानी हुनुले गर्दा बेरोजगारी बढेको बताउँदै उनले उद्योग स्थापना र लगानीको वातावरण निर्माण गर्न आवश्यक भएको बताए । उनले आफु सोही कार्यका लागि आवश्यक ऐनहरु निर्माण कार्य अघि बढाउन लागेको पनि जानकारी दिए ।
मन्त्री थापाका अनुसार देश सिमेन्ट र चिनीमा मात्र आत्मनिर्भर हुने अवस्थामा रहेको छ । ‘बन्द भएका म्याग्नेसाइड, औषधि, चिनी, कपडा उद्योगहरु सञ्चालनमा ल्याउने र त्यसमा दश हजार नेपालीलाई रोजगारी सिर्जना गर्ने संकल्प लिएकाने छु’ उनले भने ।
मन्त्री थापाले देशका विभिन्न ठाउँमा औधोगिक क्षेत्र बनाउने लक्ष्यका साथ मन्त्रालयमा अध्ययन प्रक्रिया अघि बढाएको पनि बताए । उनले भने, ‘यसका साथै उच्च प्राथमिकताका साथ देशमा कृषि, पर्यटनलाई अघि बढाउन आवश्यक छ ।’
नेपालको १० ठाउँमा पेट्रोलियम पर्दाथ, काठमाडौ लगायत १० ठाउँमा ग्याँस, ३ ठाउँमा युरोनियम रहेको जानकारी दिदै उद्योग मन्त्री कर्णबहादुर थापाले त्यसको संभावना अध्ययन भईरहेको पनि बताए ।
