काठमाडौं- मादक पदार्थ सेवन (मापसे) गरेर गाडी चलाउने पूर्वमन्त्रीदेखि बहालवाला सभासद्सम्म ट्राफिक कारबाहीमा परेका छन् ।
पछिल्लोपटक पूर्वराज्यमन्त्री खोभारी राया यादब तथा बाहालवाला सभासद अर्जुन जोशी र आङटावा शेर्पा प्रहरी कारबाहीमा परेका हुन् ।
स्वयम्भूमा बिहीबार राति ट्राफिक प्रहरीले एउटा मोटरसाइकल रोक्यो । ट्राफिकलाई छल्ल खोज्दा चाकल सडकमा पछारिए । मदिराले मातिएका ती चालक थिए पूर्वराज्यमन्त्री यादब । सुरुमा ट्राफिक प्रहरीले ठम्याउन सकेन । सोधपुछ गर्दा उनी पूर्वमन्त्री भएको खुल्यो ।
यसअघि उनी तीनपटक कारबाहीमा परिसकेको स्रोतले बताएको छ ।
केहीदिन अघि सभासद् जोशी पनि ललितपुरको सानेपामा ट्राफिक प्रहरीको फन्दामा परेका थिए । त्यस्तै नेपाली कांग्रेस रामेछापका नेता एवं सभासद् आङटावा शेर्पा पनि मापसे गरेर सवारी चलाइरहेका बेला राजधानीको कमलपोखरीबाट पक्राउ परेका थिए ।
मापसे कारबाहीमा पूर्वअर्थ सचिव रामेश्वर खनाल पनि परेका छन् । खनाललाई सुकेधाराबाट केहीसमय अघि समातिएको थियो । उनीहरु सबैको लाइसेन्स प्वाल पारेर प्रहरीले दिएको छ ।
चलचित्रका नायक भुवन केसी पनि दुई दिन अघि दोस्रो पटक मापसे कारबाहीमा परेका छन् ।
ट्राफिक महाशाखाका प्रमुख डीआईजी केशव अधिकारीले मापसे कारबाहीमा कसैलाई छुट नदिन मातहतका कार्यालयका इन्चार्जलाई निर्देशन दिएका छन् । ***
