काठमाडौं- सरकारले दक्षिण एसियाली क्षेत्रीय सहयोग संगठन (सार्क) को १८ औं शिखर सम्मेलन पर्यटकीय सहर पोखरामा गर्न तयारी सुरु छ। पोखराको सम्भाव्यता र सुरक्षाको पाटो अध्ययन गर्ने काम भइरहेको परराष्ट्र मन्त्रालय उच्चस्रोतले बताएको छ ।
यसअघि सन् १९८७ र २००२ मा नेपालले राजधानी काठमाडौंमा सम्मेलन गरेको थियो ।
आयोजक राष्ट्रको हैसियतले नेपालले १८ औं शिखर सम्मेलन कात्तिक अन्तिम वा मंसिर पहिलो सातामा गर्न सदस्य राष्ट्रसमक्ष प्रस्ताव गरेको छ। प्रधानमन्त्री कार्यालयबाट काठमाडौंबाहेक अन्य सहर रोज्न परराष्ट्र मन्त्रालयलाई सुझाव दिइएको छ।
काठमाडौंबाहिर सम्मेलन गर्दा त्यस क्षेत्रको छुट्टै प्रचार हुने, काठमाडौंबाहेक पनि ठूला सहर नेपालमा छन् भन्ने सन्देश अन्तर्राष्ट्रिय क्षेत्रमा जाने र सम्मेलन तयारीका क्रममा सम्बन्धित क्षेत्रको विकास हुने हुनाले पनि राजधानीको विकल्प खोज्न लागिएको हो।
