पोखरा- प्रधानमन्त्री सुशील कोइरालाले अबको एक वर्षभित्र संविधान जारी गरेरै छाड्ने बताउनुभएको छ ।
पोखरा क्षेत्रीय अन्तर्राष्ट्रिय विमानस्थल निर्माण सरोकार समितिले पोखरामा गरेको स्वागत कार्यक्रममा प्रधानमन्त्री कोइरालाले आफ्नो नेतृत्वलाई एक वर्ष समय दिएमा संविधान जारी गर्ने प्रतिबद्धता व्यक्त गर्नुभएको हो ।
‘कमसेकम एक वर्ष समय दिनुस्,’ प्रधानमन्त्री कोइरालाले भन्नुभयो, ‘एक वर्षभित्रै संविधान जारी हुन्छ, यो मेरो दृढता हो ।’ मुलुक शान्ति, स्थायीत्व र विकासतर्फ लम्किसकेकाले अब संविधान निर्माण र विकासका कामले तीव्रता पाउने उहाँले बताउनुभयो ।
प्रधानमन्त्री कोइरालाले मुलुक लामो समयसम्म द्वन्द्वमा फसेकाले विकासको थालनी हुन नसकेको भन्दै अबको केही वर्षमा मुलुकमा विकासको लहर सुरु हुने बताउनुभयो ।
प्रधानमन्त्री कोइरालाले पोखरामा क्षेत्रीय अन्तराष्ट्रिय विमानस्थल बन्नेमा विश्वस्त हुन सबै पोखरेलीहरुलाई आग्रह पनि गर्नुभएको छ । विमानस्थल निर्माणका लागि चीनको सिएएमसी कम्पनीलाई जिम्मा दिइसकेको अवस्थामा अब विमानस्थल निर्माणका विषयमा शंका गरिरहनु आवश्यक नरहेको उहाँले बताउनुभयो ।
