काठमाडौं – जापानमा पहिलो नेपाली चिकित्सककारुपमा चिनिएका स्व. डा. योगेन तुलाचनको स्मृतिमा थकाली सेवा समिति जापानले गत हप्ता मुस्ताङमा निःशुल्क स्वास्थ्य शिविर सम्पन्न गरेको सो सँस्थाका निवर्तमान अध्यक्ष शरदकुमार गौचनले बताएका छन् ।
शिविरमा थकाली स्वास्थ्यकर्मी परिवारको प्राविधिक सहयोग, निप्पोन पोलिक्लिनिक एण्ड डायग्नोस्टिक सेन्टर र नेपाल-जापान सम्पर्क समिति थसेस परिवार नेपालको विशेष सहयोग रहेको थियो । कार्यक्रमका लागि डा. दीपेश शाक्यको नेतृत्वमा ५ चिकित्सकसहित १५ जनाको टोली काठमाडौंबाट मुस्ताङ पुगेको थियो ।
टुकुचेमा आयोजित शिविरमा आसपासका गाविसबाट आएका समेत गरी २ सय ५० जनाले सेवा लिएका थिए । सेवा लिनेमा आधाभन्दा बढी महिला रहेका थिए । शिविरमा आएका बिरामीमध्ये धेरैलाई हड्डी खिएर हुने ओस्टियोआर्थराइटिस र यूरिक एसिड भएको पाइएको थियो । केही बिरामीलाई भने अन्य अस्पतालमा रिफर गरिएको थियो ।
शिविरमा स्त्री रोग, प्रसूति, हाडजोर्नी, बालरोग, सुगर, उच्च रक्तचापलगायतको उपचार गरिएको थियो । शिविरमा सुगर, युरिक एसिड, हेमोग्लोविन परीक्षण तथा इसिजीलगायतका सेवा पनि दिइएको थियो । शिविरमा डा. दीपेश शाक्य, डा. सुष्मा भट्टचन, डा. कुमार श्रेष्ठ, डा. कृपा शेरचन र डा. जया तुलाचनले सेवा दिएका थिए ।
त्यसैगरी कुञ्जो गाविसको ताक्लुङ निमाविमा आयोजित शिविरमा करिब ३ सय जनाको स्वास्थ्य परीक्षण गरिएको थियो । जसमध्ये अधिकांशलाई उच्च रक्तचाप र मधुमेहको समस्या देखिएको थियो ।
अत्यधिक चिसो मौसम र अधिक मदिरा सेवनका कारण यस्तो समस्या हुने डा. दीपेश शाक्यले जानकारी दिए । उनीहरुमा उपचारका साथै जनचेतनाको पनि आवश्यकता रहेको डा. शाक्यले बताए । महिलामा पेट दुख्ने, पाठेघर खस्ने र सेतो पानी बग्ने समस्या रहेको डा. जया तुलाचनले जानकारी दिएकी छन् ।
यसैगरी बालबालिका अधिकांशमा खोकी लाग्ने र सरसफाइको कमीका कारण छालाजन्य रोग देखिएको डा. सुष्मा भट्टचनले बताइन् । शिविरमा सेवा लिएका बिरामीमा हाडजोर्नी, यूरिक एसिड र मदिराजन्य रोग धेरै देखिएको डा. कृपा शेरचनले जानकारी दिएकी छन् ।
शिविरमा करिब ५० जना बिरामीको इसिजीसमेत गरिएको थियो । स्वास्थ्य सुविधाबाट वञ्चित मुस्ताङका जनताले स्वास्थ्य शिविरबाट लाभ लिएको र आगामी दिनमा पनि वृहत स्वास्थ्य शिविर गर्ने थकाली स्वास्थ्यकर्मी परिवारका अध्यक्ष तथा शिविर संयोजक विश्व शेरचनले समुद्रपारिलाई बताएका छन् । (फ़ोटो सौजन्य: थसेस जापान) ****
