विमानस्थलमा लगेज फोरेर लोडरले नै विदेशी मुद्रा चोरे

चोरी गर्ने पक्राउ परेका छन्

काठमाडौं- विमानसम्म लैजाने लोडरले नै त्रिभुवन अन्तर्राष्ट्रिय विमानस्थलमा यात्रुको सामान लगेज फोरेर विदेशी मुद्रा चोरी गरेका छन् ।

एयर अरेबियाको उडानबाट शारजहा जान लागेका नेपाली यात्रु विश्वचन्द्र वादे श्रेष्ठको लगेज फोरेर उदयपुरका १९ वर्षीय रमेश मिरिनचिङ्गले ३ हजार २ सय ६० अमेरिकी डलर र दुई सय युरो चोरी गरेका हुन् । उनले गन्तव्यमा पुगेपछि मात्र चोरीबारे थाहा पाएका थिए । त्यहाँबाटै उनले प्रहरीमा उजुरी दिएका थिए ।

आजाद निर्माण सेवाबाट खटिएका मिरिनचिङ्गले जहासम्म सामान पुर्‍याउने क्रममा बीचमै लगेज फोरेका थिए ।

विमानस्थल सुरक्षा प्रमुख नायब महानिरीक्षक (डीआईजीपी) यादव अधिकारीका अनुसार सीसीटीभी फुटेजमा पनि उनले चोरी गरेको दृश्य कैद छ । उनको साथबाट प्रहरीले चोरी भएको डलर र युरो बरामद गरेको छ ।