काठमाडौं – पोखरामा क्षेत्रीय अन्तर्राष्ट्रिय विमानस्थल निर्माण गर्ने कुरा अब सुनिश्चित भएको छ ।
सरकार र चिनिया ठेकेदार कम्पनी सीएएमसी इन्जिनियरिङ कम्पनीबीच निर्माण सम्झौता भएपछि विमानस्थल बन्ने पक्का भएको हो ।
इपीसी मोडेलमा निर्माण सुरु भएको ४ वर्ष भित्र विमानस्थलको सम्पूर्ण काम सक्ने गरी सहमति भएको छ । २ सय १५ दशमल ९ मिलियन अमेरिकी डलर (करिव २१ अर्ब) मा विमानस्थल निर्माणको जिम्मा सीएएमसीलाई दिने निर्णय भएको हो ।
अन्तर्राष्ट्रिय विमानस्थल निर्माण हुने भएपछि पोखरामा खुसीयाली छाएको छ । पोखराका उद्योगी व्यवसायी तथा सर्वसाधरणले खुसीयाली मनाएका छन् । सभासदद्वय रविन्द्र अधिकारी र शारदा पौडेलले पत्रकार सम्मेलन गरी सरकारको निर्णयको स्वागत गरेका छन् ।
पोखरामा अन्तर्राष्ट्रिय विमानस्थल बन्ने पक्का भएको बताउँदै सभासद अधिकारीले समयमा नै निर्माण सम्पन्न गर्नका लागि सबैले आ–आफ्नो ठाउँबाट सहयोग गर्नुपर्ने बताए ।
अन्तर्राष्ट्रिय विमानस्थल निर्माणका लागि २०३१ सालमा ३ हजार १ सय ६ रोपनी जग्गा पोखराको छिनेडाँडामा अधिग्रहण गरिएको थियो । जग्गा अधिग्रहण गरिएको करिव ४० वर्षपछि विमानस्थल बन्ने प्रक्रिया अगाडि बढेको हो । विमानस्थल निर्माणका लागि थप ५ सय रोपनी जग्गा अधिग्रहणको प्रक्रियामा छ ।
अधिग्रहण गरिने जग्गालाई मुआब्जा दिनका लागि सरकारले १ अर्ब छुट्याइसकेको छ । सन् २०१२ फरवरी ९ मा नागरिक उड्डयन प्राधिकरणले इपीसी मोडलमा पोखरामा विमानस्थल निर्माणका लागि बोलपत्र आह्वान गरेको थियो । रासस ***
प्राधिकरणले गरेको लागत अनुमान भन्दा बढीको बोलपत्र परेपछि प्रक्रिया अगाडि बढ्न सकेको थिएन । लागत अनुमान भन्दा बढीको बोलपत्र परेर विमानस्थल निर्माण प्रक्रिया अवरुध्द भएपछि पोखरेलीहरु आन्दोलनमा उत्रिएका थिए । ***
