काठमाडौं- भारतको केन्द्रीय बैंकले आफ्नो मुद्राको विनिमयदरलाई बजारसँग जोड्न नीतिगत परिवर्तन गर्ने तयारी थालेपछि नेपाली रुपैयाँ (नेरु) थप अवमूल्यन हुने सम्भावना देखिएको छ ।
बजारमा देखिएको मूल्यवृद्धि, आयात र निर्यातको अवस्था लगायतलाई प्रतिनिधित्व गर्ने गरी भारतीय रिजर्भ बैंक (आरबीआई) ले भारतीय रुपैयाँ (भारु) को आधार विनिमय दर तयार पार्न थालेको छ ।
आरबीआईले ‘रियल इफेक्टिभ एक्सचेन्ज रेट’ को गणना गर्दा खुद्रा मूल्य सूचकांक (सीपीआई) लाई आधार मान्ने भएको छ । यस्तो दर निकाल्दा मुलुकको व्यापारसहित मूल्य वृद्धिलाई पनि सामेल गरिएको हुन्छ । नयाँ आर्थिक वर्षदेखि विनिमय दर निकाल्दा थोकको साटो खुद्रा मूल्य वृद्धि प्रयोग गरिनेछ ।
थोकभन्दा खुद्रा मूल्य वृद्धिको अनुपात बढी हुने भएकाले भारतको मुद्रा पहिलाभन्दा कमजोर हुने देखिएको छ । रोयटर्सका अनुसार गत मार्च महिनामा खुद्रा मूल्य राखेर हिसाब गर्दा भारतीय रुपैयाँ ४ प्रतिशतले अधिमूल्यन हुने देखिएको छ ।
नयाँ तरिकाले विनिमय दर हेर्दा भारतीय रुपैयाँ अन्य विदेशी मुद्राको तुलनामा थप कमजोर हुनेछ । जसले नेपाली रुपैयाँलाई पनि डलर, युरो, पाउन्डलगायत मुद्राको तुलनामा अझै कमजोर बनाउनेछ । ***
