१२ जनालाई कारबाही गर्ने
बनेपा- नेकपा एमालेको भातृ संगठन युवा संघ नेपालको धुलिखेलमा जारी तेस्रो पूर्ण बैठक हात हालाहाल भएपछि सोमबार साँझ सकिएको छ।
अध्यक्ष महेश बस्नेतले स्वेच्छाचारी ढंगले बैठकको अन्त्यमा कारबाहीको प्रस्ताव ल्याएको भन्दै केन्द्रीय सचिवालय सदस्य शेरबहादुर तामाङ (रामेछाप) र अर्जुन गुरुङ (दाङ) पदाधिकारी बसेको मञ्चमा जान खोजेपछि विवाद सुरु भएको थियो।
तीन दिनसम्म गुपचुप राखेर बैठकको अन्त्यमा १२ जनालाई निलम्बन प्रस्ताव पारित गरिएकाले तनावको स्थिति आएको युवा संघ काभ्रेका एक सदस्यले जानकारी दिए।
तामाङ र गुरुङले मञ्चमै गएर अध्यक्ष बस्नेतसँग कारबाहीको कारण सोध्न खोज्दा स्वयंसेवकले घचेटेको र यसै कारणले विवाद सुरु भएको सहभागी एक सदस्यले बताए।
बैठकले १२ जनालाई कारबाही गर्ने निर्णय गरे पनि १० जनाको नाम गोप्य राखिएको छ।
विवादले उग्र रुप लिएपछि पत्रकार सम्मेलनसमेत स्थगित गर्दै अध्यक्ष महेश बस्नेतलगायत पदाधिकारी धुलिखेल तालिम केन्द्रस्थित बैठकस्थलबाट बाहिरिएका थिए।
