विमान खोजीमा भरपर्दो आधार

पर्थ- अस्ट्रेलियाको नौसैनिक जहाजले पानीको तल्लो भागबाट नयाँ संकेत प्राप्त गरेको छ । उक्त संकेत मलेसियन एयरलाइन्सको बेपत्ता विमानको ब्ल्याक बक्सको जस्तो देखिएको अस्ट्रेलियाली प्रतिरक्षा सेनाका अवकाशप्राप्त प्रमुख अंगस हस्टनले बताए । विमान खोजीका लागि एकमहिने प्रयासपछि भरपर्दो संकेत हुन सक्ने उनले बताए ।

हिन्द महासागरको तल्लो सतहबाट आएको उक्त संकेतले खोजी दल पुगेकै स्थानमा उक्त विमान हुन सक्ने आधार पाइएको उनको दाबी छ । रेकर्डरको क्षमताअनुसार ३० दिने अवधि नाघ्ने अवस्थामा पुगिसकेको छ ।

अस्ट्रेलियाली प्रतिरक्षा जहाज ओसियन सिल्डले प्रयोगमा ल्याएको संकेत प्रक्षेपक खोज यन्त्रले विमानको ब्ल्याक बक्सबाट आउने संकेत प्राप्त गरेको हो ।

यस विषयमा थप जानकारी आवश्यक पर्ने र पछिल्लो २४ घन्टामा प्राप्त भएका तथ्य निकै आशाप्रद् भएको हस्टनले बताए ।