काठमाडौं- सत्य निरुपण तथा मेलमिलाप आयोग र बेपत्ता छानबिन आयोग गठन सम्बन्धि मस्यौदा आज तयार हुने भएको छ ।
दलहरु तर्फबाट आज मस्यौदालाई अन्तिम रुप दिएपछि सरकारले विधेयकका रुपमा संसदमा पेश गर्नेछ ।
शीर्ष तहमा भएको सहमति अनुसार आज मस्यौदालार्ई अन्तिम रुप दिएपछि कानून मन्त्रालयले भोलि विधेयकका रुपमा संसदमा दर्ता गराउने छ । मस्यौदाको भाषा र नीतिगत विषयमा शीर्ष नेताहरुबीचको हिजोको सहमति अनुसार अन्तिम रुप दिन आज दलीय कार्यदलको बैठक बस्दैछ । दिउँसो साढे १२ बजे कानून मन्त्रालयमा बस्ने बैठकले हिजो शीर्ष तहको सहमति अनुसार विधेकको मस्यौदालाई अन्तिम रुप दिने कार्यदलका सदस्य प्रदीप् नेपालले बताए ।
उनका अनुसार आजै सरकारलाई मस्यौदा बुझाइने छ । दुई साताभित्र विधेयक ल्याउने भनेको म्याद सकिन एक दिन बाँकी छ ।
सरकारी तहको सुझाव कार्यदलले सरकारलाई बुझाएको प्रतिवेदनमा सत्य निरुपण तथा मेलमिलाप आयोग गठनसम्बन्धी विधेयक, बेपत्ता पारिएका व्यक्तिको छानबिन आयोग गठनसम्बन्धि विधेयक र व्यक्ति बेपत्ता पार्ने कसुर र सजाय विधेयकका छुट्टा–छुट्टै विषय समेटिएका छन् ।
