भारतीय क्रिकेट समर्थकद्वारा युवराज सिंहको घरमा ढुंगा प्रहार

काठमाडौं- ट्वान्टी–ट्वान्टी विश्वकप क्रिकेटको फाइनलमा भारत पराजित हुनुमा युवराज सिंहको फितलो प्रदर्शन कारण भएको भन्दै क्रिकेट प्रेमीले सिंहको घरमा ढुंगा प्रहार गर्दै तोडफोड प्रयास गरेका छन् ।

चण्डिगढस्थित उनको घर अगाडि जम्मा भएका भारतीय क्रिकेट समर्थकले घरमा ढुंगा हान्दै सिंह विरुद्ध नाराबाजी गरेको इन्डिया टुडेले जनाएको छ । प्रदर्शनकारीलाई नियन्त्रणमा लिन प्रहरी परिचालन गरिएको थियो ।

आइतबार बंगलादेशको ढाकामा भएको फाइनलमा मध्यमक्रममा क्रिजमा पुगेका युवराजले बिर्सनलायक खेल पस्किएका थिए । २१ बल ब्याटिङ गरेका उनले ११ रन मात्र बनाउन सके । विकेट र बल पर्याप्त बाँकी छदाँ पनि भारतले श्रीलंका सामु खुलेर ब्याटिङ गर्न नसक्दा पूरा २० ओभरमा ४ विकेटको क्षतिमा एक सय ३० रनमा समेटिएको थियो ।