काठमाडौं- विदेशी पीआएर लिएका एक सहसचिवलाई कारबाहीको विषयलाई लिएर दुई मन्त्रीबीच बोलचाल बन्द भएको छ ।
सामान्य प्रशासन मन्त्री लालबाबु पण्डितले अर्थ मन्त्रालयका सहसचिव भरत सुवेदीलाई कारबाही गर्न खोजेपछि अर्थमन्त्री डा रामशरण महत कडकिएका हुन् । सहसचिव सुवेदीलाई अर्थमन्त्री महतले आफ्नो मन्त्रालयमा नयाँ पदस्थापन सहितको जिम्मेवारी दिन खाजेका छन् । तर, सामान्य प्रशासनमन्त्री पन्डितले सुवेदी विदेशीसँग विदेशी पीआर भएको भन्दै उनलाई अर्थमा नभई कारवाही गर्नुपर्ने अडान लिँदै आएका छन् ।
अर्थमन्त्री महतले भने अनाबश्यक कुरा उठाएको भन्दै सुवेदीलाई जसरी पनि अर्थमा ल्याउने पक्षमा छन् । यसै विषयलाई लिएर बिहीबारको मन्त्रिपरिषद बैठकमा महत र पण्डितबीच चर्काचर्की समेत भएको स्रोतको दाबी छ ।
सामान्य प्रशासन मन्त्रालयमा रहेका वा मन्त्रालयको क्षेत्राधिकारभित्र पर्ने कुनैलाई पनि सरुवा, बढुवा गर्न नपाइने भन्दै मन्त्री पण्डितले अडान लिएका छन् । सचिव, सहसचिव जुनसुकै तहको भएपनि डिभी परेका, पीआर पाएका र ग्रीन कार्ड लिएकालाई कारबाही गर्ने सामान्य प्रशासन मन्त्री पण्डितको अडान छ ।
