काठमाडौं- प्रहरीले गुण्डा नाइके गणेश लामालाई पक्राउ गरेको छ । महानगरीय प्रहरी परिसरबाट खटिएका साझा पोसाकका प्रहरीले लामालाई शनिबार सिनामंगलबाट पक्राउ गरेको हो ।
उनलाई सार्वजनिक अपराध ऐन अन्तर्गत आइतवार जिल्ला अदालत काठमाडौंबाट म्याद थप गरी अनुसन्धान भइरहेको प्रहरी परिसरका प्रवक्ता अर्जुन चन्दले जानकारी दिए ।
एसएसपी रमेश खरेल काठमाडौं प्रहरी प्रमुख भएर आएपछि पक्राउ परेका लामा अर्का चर्चित गुण्डा नाइके हुन् । यसअघि गुण्डानाइके दिपक मनाङ्गे लगायतलाई पनि प्रहरीले पक्राउ गरेको थियो ।
प्रहरीले उनीविरुद्ध गुण्डागिरी, जर्वजस्ती ठेक्कापट्टा लिने, हतियार देखाएर रकम असुल्ने लगायतका आरोप लगाएको छ । त्यस्तै लामाले अन्य गुण्डाहरुलाई बटुलेर मानिसहरुलाई धम्काएर रकम असुल्ने कार्य गरेको पनि पाइएको प्रवक्ता चन्दले बताए ।
लामा पूर्वगृहमन्त्री विजयकुमार गच्छदार अध्यक्ष रहेको मधेसीजनाधिकार फोरम लोकतान्त्रिकका केन्द्रीय सदस्य समेत हुन् ।
गच्छदार गृहमन्त्री हुँदा उनी फोरम लोकतान्त्रिकमा प्रवेश गरेका थिए । उनी माथि अवैध सम्पत्ति आर्जन गरेको आरोपमा विशेष अदालतमा सम्पत्ति शुद्धिकरण अनुसन्धानको मुद्धा चलिरहेको छ ।
