विदेशबाट फर्केका दुई युवा धरानमा लुटिए

विराटनगर- वैदेशिक रोजगारीबाट घर फर्केका दुई युवा धरानमा शनिबार लुटिएका छन् ।

लुटिनेमा तेह्रथुम यावरा–९ का सुमन जोगी र धरान–१५ का सन्तकुमार लिम्बू रहेको प्रहरीले जनाएको छ । कतारबाट बिदामा घर आउने क्रममा धरानमा उनीहरू लुटिएका हुन् ।

शुक्रबार बेलुका काठमाडौबाट बस चढेर धरान आइपुगेका उनीहरू अचेत अवस्थामा शनिबार भेटिएका थिए ।

उनीहरूको साथमा रहेको मोबाइल, पर्स, औँठी, सिक्री तथा घडी लुटिएको छ । बोल्नै नसक्ने अवस्थामा फेला परेका उनीहरूलाई उपचारका लागि बिपी कोइराला स्वास्थ्य विज्ञान प्रतिष्ठान लगिएको वडा प्रहरी कार्यालयका इन्चार्ज कालुमान राईले जानकारी दिनुभयो ।

उनीहरूको होस खुलेपछि यस सम्बन्धमा थप अनुसन्धान गरिने प्रहरीले जनाएको छ ।